نیویارک: (ویب ڈیسک) دنیائےفٹبال کے نامور کھلاڑی کرسٹیانو رونالڈو نے ایک اور اعزاز اپنے نام کرتے ہوئے دنیا کے پہلے کھرب پتی فٹبالر ہونے کا اعزاز اپنے نام کر لیا ہے۔
غیر ملکی جریدے بلوم برگ کی تازہ ترین بلینیئرز انڈیکس کے مطابق کرسٹیانو رونالڈو کی دولت کا تخمینہ 1.4 ارب ڈالر لگایا گیا ہے جو پاکستان کرنسی میں 3 کھرب 93 ارب روپے سے زائد کی رقم بنتی ہے، 40 سالہ سٹار فٹبالر کی دولت میں اس وقت نمایاں اضافہ ہوا جب انہوں نے جون میں سعودی کلب النصر کے ساتھ ایک نیا معاہدہ کیا، اس معاہدے کی مالیت تقریباً 400 ملین ڈالر بتائی گئی ہے۔
رونالڈو نے 2002ء سے 2023ء کے دوران صرف تنخواہ کی مد میں 550 ملین ڈالر سے زائد کمائے جبکہ نائک کے ساتھ ایک دہائی پر محیط سپانسرشپ ڈیل سے انہیں ہر سال تقریباً 18 ملین ڈالر حاصل ہوئے، اس کے علاوہ رونالڈو نے دیگر مشہور برانڈز کے اشتہارات سے 175 ملین ڈالر سے زیادہ کی آمدنی حاصل کی۔
سال 2023ء میں رونالڈو کی مانچسٹر یونائیٹڈ سے سعودی فٹبال کلب النصر منتقلی نے رونالڈو کو فٹبال کی تاریخ کا سب سے زیادہ معاوضہ لینے والا کھلاڑی بنایا، ان کا یہ سالانہ معاہدہ 177 ملین پاؤنڈ مالیت کا تھا، پرتگالی فٹبالر اب ان چند کھلاڑیوں کی فہرست میں شامل ہو گئے ہیں جو کھیل کی دنیا میں ارب پتی بنے، اس فہرست میں مائیکل جارڈن، میجک جانسن، لیبرون جیمز، گالفر ٹائیگر ووڈز اور ٹینس سٹار راجر فیڈرر جیسے نام نمایاں ہیں۔
