اسلام آباد: (دنیا نیوز) اسلام آباد میں جاری سی اے ایس انٹرنیشنل سکواش چیمپئن شپ میں پاکستان کے 3 کھلاڑی سیمی فائنل میں جگہ بنانے میں کامیاب ہوگئے۔
چیمپئن شپ کے کوارٹر فائنل راؤنڈ میں حمزہ خان نے ٹاپ سیڈ مصر کے کریم الحمامی کو 1-3 سے شکست دی، 44 منٹ جاری رہنے والے میچ میں حمزہ خان کی جیت کا سکور 11-8، 11-5، 7-11، 12-10 رہا۔
ایک اور میچ میں نور زمان مصر کے یاسر شوڈی کو 0-3 سے شکست دے کر ٹاپ فور میں جگہ بنانے میں کامیاب رہے، نور زمان کے مصر کے پلیئر کے خلاف جیت کا سکور 11-8، 11-5، 7-11، 12-10 رہا۔
ناصر اقبال نے کوارٹر فائنل میں مصر کے تھرڈ سیڈ مصطفیٰ السرطی کو 0-3 سے ہرایا، ان کی کامیابی کا سکور 11-4، 11-9، 11-6 رہا۔
ایونٹ کے 4 سیمی فائنلسٹس کھلاڑیوں میں سے 3 کا تعلق پاکستان سے ہے، سوئٹزرلینڈ کے ڈیوڈ بارنیٹ نے بھی ٹاپ فور میں جگہ بنالی ہے، سی اے ایس انٹرنیشنل سکواش چیمپئن شپ کی انعامی رقم 37 ہزار ڈالرز ہے اور یہ پی ایس اے ورلڈ ٹوور کا کوپر ایونٹ ہے۔
