کیلیفورنیا: (ویب ڈیسک) نئے فیچر کے اضافے کے بعد اب آپ واٹس ایپ میں موجود رہتے ہوئے ہی انسٹاگرام اور فیس بک کی ویڈیو آسانی سے دیکھ سکتے ہیں۔ اب اس نئے اپ ڈیٹ کے ذریعے آپ واٹس ایپ استعمال کرتے ہوئے فیس بک اور انسٹا گرام کی ویڈیو چلاسکتے ہیں، ویڈیو کو ری سائز کرسکتے ہیں یا بہتر طور پر دیکھنے کے لیے فل اسکرین موڈ اختیار کرسکتے ہیں۔
واٹس ایپ نے آئی او ایس میں آج ہی اس نئے فیچر کو جاری کرنے کا اعلان کیا ہے تاہم اس کا اینڈروئڈ متبادل تاحال جاری نہیں ہوسکا ہے۔ واٹس ایپ کے نئے فیچر کے ذریعے ان دونوں سائٹس یا ایپس سے آنے والے پیغامات میں موجود ویڈیو لنک کو انگلی سے چھوتے ہی ویڈیو کلپ ایک فلوٹنگ ونڈو میں ظاہر ہو جاتا ہے اور اس دوران واٹس ایپ پر پیغام رسانی کے معمولات جاری رکھے جا سکتے ہیں۔
واضح رہے کہ یہ نیا فیچر فیس بک کی ایک ذیلی سروس کے اپ ڈیٹ کا حصہ ہے جس کی بدولت فیس بک اور دیگر ایپس کے درمیان راوبط کو بڑھایا جائے گا۔ اس کے لیے ایپ اسٹور سے واٹس ایپ کا نیا آئی او ایس اپ ڈیٹ ڈاؤن لوڈ کرنا ہوگا جو تصویر میں تصویر ( پکچر اِن پکچر) موڈ کو سپورٹ کرتا ہے اور واٹس ایپ پہلے ہی یہ فیچر متعارف کراچکا ہے۔
واٹس ایپ کمپنی کے ترجمان نے بتایا ہے کہ اب جب بھی آپ کو واٹس ایپ پر انسٹا گرام یا فیس بک ویڈیو کا لنک ملتا ہے تو اسے واٹس ایپ کے اندر ہی چلانا ممکن ہے۔ معمول کی چیٹ کے دوران آپ ویڈیو بھی دیکھ سکتے ہیں تاہم آئی او ایس کے لیے واٹس ایپ اپ ڈیٹ میں دیگر بہت سے نئے فیچرز بھی موجود ہیں۔
