لاہور: (ویب ڈیسک) پاکستان کے صارفین بھی فیس بک اور انسٹاگرام سے پیسے کما سکتے ہیں جس کیلئے میٹا نے پاکستان میں فیس بُک مونیٹائزیشن سے متعلق سٹارز پروگرام کا آغاز کر دیا ہے۔
فیس بک اور انسٹاگرام صارفین کو ان سوشل ایپس کے استعمال سے رقم حاصل کرنے کیلئے پہلے اسٹارز حاصل کرنا ہوں گے۔ جو لوگ فیس بک اور انسٹاگرام استعمال کر رہے ہیں، انہیں جتنے اسٹارز ملیں گے وہ اتنے ہی پیسے کما سکیں گے۔
فیس بک صارفین کی جانب سے اس پروگرام کو سراہا جا رہا وہاں بہت سے لوگوں کا سوال ہے کہ یہ سٹارز کیسے حاصل کیے جا سکتے ہیں اور کتنے سٹارز کمانے پر کتنے پیسے ملیں گے۔
مذکورہ ایپس پر شیئر کی گئیں پوسٹوں کو دیکھنے والے صارفین یعنی آپ کے دوست، فالوورز یا دیگر صارفین سٹارز خرید کر آپ کو بھیج سکتے ہیں۔ یہ سٹارز آپ کی لائیو یا آن ڈیمانڈ ویڈیوز پر بھیجے جا سکتے ہیں۔ ہر ایک سٹار پر فیس بک آپ کو 0.01 امریکی ڈالر دے گا۔
پبلک پوسٹوں پر سٹارز خود سے ایکٹو ہوتے ہیں جبکہ وصول کیے گئے سٹارز کو پیسوں میں بدلنے کیلئے ایک کونٹینٹ کری ایٹر کو پارٹنر مونیٹائزیشن اور کونٹینٹ مونیٹائزیشن کی پالیسیوں سے متفق ہونا ہوگا اور قوائد و ضوابط پر عمل کرنا ہوگا۔
بی بی سی کے مطابق فیس بک نے اس پروگرام کو گیمنگ اور نان گیمنگ کیٹگری میں تقسیم کیا ہے۔ فیس بک سٹارز پروگرام کے ذریعے پیسے کمانے کیلئے ضروری ہے کہ کم از کم مسلسل 60 دن تک آپ کے ایک ہزار فالوورز ہوں، آپ تمام اصولوں سے اتفاق کرتے ہوں اور ان پر عمل کریں جبکہ آپ کی عمر 18 سال یا اس سے زیادہ ہو۔
فرض کریں کہ آپ کوئی ریل، فیس بک لائیو یا آن ڈیمانڈ ویڈیو دیکھ رہے ہیں۔ اگر آپ کو یہ مواد پسند آتا ہے تو آپ اس صارف کو سراہتے ہوئے اسے سٹارز دے سکتے ہیں۔ اگر کوئی ایک ڈالر خرچ کر کے کسی کو 100 سٹارز بھیجتا ہے تو کونٹینٹ کری ایٹر اس سے ایک ڈالر کما لیتا ہے۔
