اسلام آباد: (دنیا نیوز) نگران وزیر آئی ٹی و ٹیلی کمیونیکیشن ڈاکٹر عمر سیف نے پاکستان سٹارٹ اپ فنڈ کا اجرا کر دیا۔
تقریب میں ملکی و غیر ملکی سرماریہ کاروں، سفارت کاروں اور معروف ٹیکنالوجی کمپنیوں نے شرکت کی۔
اس موقع پر گفتگو کرتے ہوئے ڈاکٹر عمر سیف نے کہا کہ حکومت نے پاکستان سٹارٹ اپ فنڈ کے لیے 2 ارب روپے مختص کیے ہیں، اس فنڈ کا مقصد پاکستان میں وینچر سرمایہ کاری تیز تر کرنا ہے۔
انہوں نے کہا کہ اس فنڈ سے سٹارٹ اپس کو مالی معاونت فراہم کی جائے گی، سٹارٹ اپ فنڈ کے ذریعے ہر سٹارٹ اپ کو 30 فیصد معاونت دی جائے گی۔
— Ministry of IT & Telecom (@MoitOfficial) January 9, 2024
ڈاکٹر عمر سیف نے کہا ہے کہ غیر ملکی وینچر سرمایہ کار 70 فیصد سرمایہ کاری کریں گے، سٹارٹ اپ فنڈ پاکستان کی معاشی ترقی میں اہم کردار ادا کرے گا، وزارت آئی ٹی سٹارٹ اپس کو سہولتیں فراہم کرنے کے لیے کوشاں ہے۔
نگران وزیر نے مزید کہا ہے کہ 4 سال میں پاکستانی سٹارٹ اپس میں تقریباً 800 ملین ڈالرز بیرونی سرمایہ کاری ہوئی، ملک میں 8 نیشنل انکیوبیشن سینٹرز سٹارٹ اپس کو سپورٹ کر رہے ہیں، اس وقت 4 ہزار سے زائد سٹارٹ اپس کام کر رہے ہیں۔
