کیلیفورنیا: (ویب ڈیسک) گوگل کی مقبول ترین سروس یوٹیوب نے اپنے صارفین کیلئے 2 نئے بہترین فیچرز متعارف کرنے کا اعلان کر دیا۔
ویڈیو اسٹریمنگ سروس یوٹیوب انتظامیہ نے اپنے صارفین کی سہولت کیلئے جن فیچر کا اضافہ کیا ان میں سے ایک یوٹیوب شارٹس کے حوالے سے ہے، یوٹیوب شارٹس استعمال کرنے والے صارفین اب مختصر ویڈیوز کے اس سیکشن کو لائیو ویڈیو اسٹریمنگ کیلئے بھی استعمال کر سکیں گے۔
کمپنی کی جانب سے اعلان کیا گیا ہے کہ شارٹس ویڈیوز سکرولنگ کے دوران صارفین لائیو ویڈیو کا پریویو دیکھ سکیں گے جس پر کلک کرنے پر لائیو ویڈیوز کو ورٹیکل فارمیٹ میں سٹریم کرنا بھی ممکن ہوگا۔
ویسے تو یوٹیوب پر ورٹیکل فارمیٹ میں لائیو سٹریمنگ کا آپشن کافی عرصے سے موجود ہے مگر اب اسے شارٹس فیڈ کا حصہ بنایا جا رہا ہے۔
یوٹیوب کا یہ نیا فیچر ٹک ٹاک سے ملتا جلتا ہے جس کی جانب سے بھی مختصر ویڈیوز کو دیکھتے ہوئے لائیو سٹریمنگ کو دیکھنا ممکن ہے، ٹک ٹاک میں اس تبدیلی کے نتیجے میں لائیو سٹریمنگ کو کافی فائدہ ہوا اور صارفین کی انگیج منٹ میں نمایاں اضافہ دیکھنے میں آیا۔
یوٹیوب شارٹس میں لائیو سٹریمنگ کے حوالے سے ایپ میں متعدد ڈسکوری آپشنز کا اضافہ بھی کیا جائے گا۔
شارٹس میں اس نئے اضافے کے ساتھ ساتھ یوٹیوب کی جانب سے پوڈ کاسٹ براہ راست یوٹیوب سٹوڈیو سے اپ لوڈ کرنے کی سہولت بھی فراہم کی جا رہی ہے، اس تبدیلی سے صارفین اپنی آر ایس ایس فیڈ کو براہ راست یوٹیوب سٹوڈیو سے منسلک کر سکیں گے جس سے وہ اپنے مواد کو زیادہ افراد تک پہنچا سکیں گے۔
