لاہور: (دنیا نیوز) وزیراعلیٰ پنجاب مریم نواز کی ہدایت پر "فری وائی فائی" سروس کے دائرہ کار میں توسیع کر دی گئی۔
وزیر اعلیٰ پنجاب مریم نواز کی ہدایت پر لاہور کے مزید 100 مقامات پر"سی ایم مریم نواز فری وائی فائی" سروسز شروع کردی گئیں، پنجاب سیف سٹی اتھارٹی نے "سی ایم مریم نواز فری وائی فائی" کو 100 سے بڑھا کر 200 مقامات پر فعال کر دیا۔
مانگا منڈی، ملتان روڈ، بند روڈ، چوہنگ، شاہ پور کانجراں، سندر، ویلنشیا، مراکہ اور دیگر علاقوں میں فری وائی فائی سروس شروع کردی گئی جس کے ذریعے کسی بھی ایمرجنسی کی صورت میں پولیس اور اہلخانہ سے رابطہ کیا جا سکتا ہے۔
مفت انٹرنیٹ کی سہولت سے ویمن سیفٹی ایپ، پنجاب پولیس ایپ اور واٹس ایپ استعمال کیا جا سکتا ہے، مفت انٹرنیٹ سروس کے ذریعے شہری واٹس ایپ کال یا میسج کے ذریعے اپنے پیاروں سے رابطہ کر سکتے ہیں۔
حکام کے مطابق لاہور میں ہر مفت وائی فائی ڈیوائس کی رینج متعلقہ پوائنٹ سے 300 فٹ تک ہے، "سی ایم مریم نواز فری وائی فائی" کے ذریعے مختلف اپیلی کیشنز کو ڈاؤن لوڈ بھی کیا جا سکتا ہے۔
شہری مفت انٹرنیٹ سروس کو ٹیکسی رائیڈ بک کرانے کیلئے بھی استعمال کرسکتے ہیں تاہم مفت انٹرنیٹ سروس کی سہولت فیس بک، یوٹیوب، ٹک ٹاک اور دیگر انٹرٹینمنٹ ایپس کیلئے نہیں ہے۔
وزیراعلیٰ پنجاب مریم نواز کا کہنا ہے کہ ڈیجیٹل پنجاب ویژن کے تحت شہریوں کیلئے ایمرجنسی فری وائی فائی سروس مہیا کی جارہی ہے۔
