کیلیفورنیا: (ویب ڈیسک) فوٹو اینڈ ویڈیو شیئرنگ ایپ انسٹاگرام پر نصف دہائی پرانے فیچر کو دوبارہ پیش کرنے کا اعلان کر دیا گیا۔
انسٹاگرام کے سربراہ نے کچھ دن قبل ویڈیو پیغام میں بتایا تھا کہ ایپلی کیشن پر 2019 میں ختم کئے گئے فیچر کو دوبارہ پیش کیا جائے گا، نصف دہائی قبل ختم کئے گئے فیچر کو واپس متعارف کرانے کا مقصد ایپلی کیشن کے صارفین کو اپنے دوستوں کی پسند سے متعلق آگاہی فراہم کرنا بھی ہے۔
فیچر کے تحت جو صارفین کسی بھی ویڈیو یا پوسٹ کو لائیک کریں گے یا پھر کہیں بھی کمنٹ کریں گے تو ان کے دوستوں کو نوٹیفکیشن موصول ہوگا کہ ان کے دوست نے کس پوسٹ پر کمنٹ کیا ہے یا کس ویڈیو کو پسند کیا ہے۔
مذکورہ فیچر کو بہتر انداز میں پیش کرنے کا اعلان کیا گیا ہے۔
اب انسٹاگرام انتظامیہ کی کوشش ہوگی کہ صارفین کو اپنے ان دوستوں کی لائیکس اور کمنٹس سے متعلق آگاہ کیا جائے جو کہ انہوں نے کسی ویڈیو پر کئے ہوں گے، پہلے مذکورہ فیچر کے تحت ہر لائیک اور کمنٹ کا نوٹیفکیشن موصول ہوتا تھا لیکن اب کوشش کی جا رہی ہے کہ صرف ویڈیوز پر کئے گئے کمنٹس یا ویڈیوز کو لائیک کئے جانے کے نوٹیفکیشن تک محدود رکھا جائے۔
مذکورہ فیچر پہلے انسٹاگرام سمیت فیس بک پر بھی مقبول ہوتا تھا لیکن کچھ عرصے سے اس فیچر کو محدود یا ختم کر دیا گیا تھا اور اب اسے دوبارہ واپس شروع کرنے کا اعلان کیا گیا ہے۔
بعض صارفین مذکورہ فیچر کو اپنی پرائیویسی کے خلاف سمجھتے ہیں اور ان کا ماننا ہے کہ ان کی پسند یا ناپسند سے متعلق ان کے دوستوں یا فالوورز کو معلوم نہیں ہونا چاہیے، مذکورہ فیچر تک ترتیب وار صارفین کو رسائی دی جائے گی اور بعض ممالک کے صارفین کو اس تک رسائی دی جا چکی ہے۔
