اسلام آباد: (دنیا نیوز) نادرا کی میزبانی میں نیشنل رجسٹریشن اینڈ بائیومیٹرک پالیسی فریم ورک کی عملدرآمد کمیٹی کا دوسرا اجلاس ہوا۔
اجلاس میں چیئرمین نادرا نے رجسٹریشن کے موجودہ نظام کو خامیوں سے پاک بنانے کے لئے کئے جانے والے اقدامات سے آگاہ کیا، شرکا کو بتایا گیا کہ پیدائش، وفات اور ازدواجی حیثیت میں تبدیلی کے آن لائن اندراج کے لئے موبائل ایپ تیار کر لی گئی ہے۔
چیئرمین نادرا کے مطابق ایپ کے ذریعے شہری زندگی کے اہم واقعات کا اندراج گھر بیٹھے کرا سکیں گے، موبائل ایپ پہلے پنجاب میں متعارف کرائی جائے گی، شہریوں کی سہولت کے لئے پنجاب کی تمام یونین کونسلوں میں بائیومیٹرک تصدیق کی سہولت فراہم کی جا رہی ہے۔
انہوں نے کہا کہ نادرا خدمات کی فراہمی میں انقلابی بہتری آئے گی، شہریوں کی اہم معلومات کے درست ڈیٹابیس کی تیاری میں مدد ملے گی، اسلام آباد کی یونین کونسلوں میں نادرا ون ونڈو کاؤنٹر بھی قائم کئے جا رہے ہیں۔
چیئرمین پی ٹی اے نے نیشنل بائیومیٹرک پالیسی کی تیاری کے لئے جاری سرگرمیوں سے آگاہ کیا اور مسودے پر متعلقہ فریقوں کی آراء حاصل کرنے کے بعد اسے حتمی شکل دی جائے گی۔
محکمہ مقامی حکومت کے عہدیداروں کے خصوصی سیشن میں موبائل ایپ کا ڈیمو پیش کیا گیا، اجلاس میں مختلف وزارتوں اور اداروں کی قیادت اور سینئرافسران نے شرکت کی، منصوبہ بندی، ترقی و خصوصی اقدامات، داخلہ اور بین الصوبائی تعاون کی وزارتوں نے شرکت کی۔
اجلاس میں وزارت آئی ٹی و ٹیلی کمیونیکیشن اور قانون و انصاف کے نمائندوں نے بھی شرکت کی، پی ٹی اے، ایف آئی اے، امیگریشن اینڈ پاسپورٹ، ادارہ شماریات اور الیکشن کمیشن کے نمائندے بھی شریک ہوئے۔
ایس ای سی پی، آئی سی ٹی اور سی ڈی اے کے سینئر افسران بھی اجلاس میں موجود تھے، پنجاب، خیبرپختونخوا، گلگت بلتستان اور آزاد جموں وکشمیر کے مقامی حکومت کے محکموں نے بھی شرکت کی۔
اجلاس میں سٹیٹ بینک، محکمہ مقامی حکومت سندھ و بلوچستان اور آئی ٹی بورڈ سندھ و گلگت بلتستان کے نمائندوں نے آن لائن شرکت کی۔
