پشاور: (ویب ڈیسک) ضلع کرم میں سات ماہ کی طویل معطلی کے بعد فور جی انٹرنیٹ سروس بحال کر دی گئی ہے جس پر شہریوں میں خوشی کی لہر دوڑ گئی ہے۔
ضلعی انتظامیہ کے مطابق 28 ستمبر کو علاقے میں کشیدہ حالات کے باعث فورجی انٹرنیٹ سروس معطل کی گئی تھی، جس کا مقصد امن و امان کو یقینی بنانا تھا، تاہم اب صورتحال میں بہتری کے بعد سروس کو بحال کر دیا گیا ہے۔
ڈپٹی کمشنر کرم کا کہنا ہے کہ ضلع میں پائیدار اور دیرپا امن کے قیام کیلئے ہر ممکن کوششیں جاری رکھی جائیں گی، انٹرنیٹ سروس کی بحالی سے تعلیمی سرگرمیوں، کاروبار اور عوامی رابطے میں آسانی پیدا ہوگی۔
عوامی حلقوں نے سروس کی بحالی کو خوش آئند قرار دیتے ہوئے انتظامیہ سے مطالبہ کیا ہے کہ آئندہ کسی بھی صورت میں انٹرنیٹ جیسی بنیادی سہولت کو مستقل بنیادوں پر بند نہ کیا جائے تاکہ ترقی اور تعلیم کا عمل متاثر نہ ہو۔
