اسلام آباد: (ویب ڈیسک) پاکستان جلد ہی اپنی پہلی ففتھ جنریشن (5G) موبائل سروسز کی سپیکٹرم نیلامی کیلئے تیار ہے۔
وفاقی حکومت نے اس حوالے سے اصولی طور پر منظوری دے دی ہے اور فروری 2026 تک نیلامی کا انعقاد متوقع ہے، جس سے ملک میں تیز رفتار موبائل انٹرنیٹ اور جدید ڈیجیٹل خدمات کی راہ ہموار ہوگی۔
وفاقی کابینہ نے سپیکٹرم نیلامی کیلئے اصولی منظوری دے کر ملک میں ڈیجیٹل ٹرانسفارمیشن کیلئے مضبوط سیاسی عزم کا اظہار کیا ہے، حکومت جلد نیلامی کے قواعد، بیس پرائسز، اور لائسنسنگ شرائط کا اعلان کرے گی تاکہ ٹیلی کام آپریٹرز کے لیے واضح رہنمائی فراہم کی جا سکے۔
نیلامی کے تحت مختلف فریکوئنسی بینڈز کی بنیاد پر قیمتیں مقرر کی جائیں گی، جبکہ بولی کے طریقہ کار، لائسنس کی مدت اور ادائیگی کے شیڈول بھی واضح کئے جائیں گے، ٹیلی کام آپریٹرز کو مخصوص کوریج اور سروس ڈپلائمنٹ کے اہداف پورے کرنے کی ذمہ داری ہوگی۔
5G سپیکٹرم نیلامی سے ملک میں تیز رفتار انٹرنیٹ، سمارٹ سٹیز، ٹیلی میڈیسن اور ای گورننس جیسی جدید خدمات کے فروغ کیلئے مواقع پیدا ہوں گے، اس سے نجی سرمایہ کاری میں اضافہ، انفراسٹرکچر کی ترقی اور معلوماتی و مواصلاتی ٹیکنالوجی کے شعبے میں روزگار کے مواقع بھی بڑھیں گے۔
