ایمسٹرڈیم: (ویب ڈیسک) دنیا بھر میں کورونا وائرس کے کیسز بڑھ رہی ہے وہیں پر خوف کا عالم بھی چھایا ہوا ہے، اس مہلک وباء کے باعث دنیا کے بیشتر ممالک میں ہزاروں افراد اپنی جان سے ہاتھ دھو بیٹھے ہیں،تاہم کچھ ایسی خبریں سامنے آ رہی ہیں جو حیران اور دلچسپ ہیں ۔اسی طرح کی ایک خبر ہالینڈ سے آئی ہے جہاں پر ہیئر ڈریسر نے مہلک وباء سے بچنے کے لیے چھتری کو اپنے اور صارف کے درمیان ڈھال بنا لیا۔
غیر ملکی خبر رساں ادارے کے مطابق کورونا وائرس سے بچنے کے لیے دنیا بھر میں لوگ نت نئے طریقے اپنارہے ہیں اور ان منفرد اندازوں کو دیکھ کر لوگ حیرت زدہ ہو جاتے ہیں۔ ہجوم میں خود کو مہلک وبا سے محفوظ رکھنے کے لیے کوئی اپنے جسم سے لکڑی کے فریم لگا رہا ہے تو کوئی فاصلہ رکھنے کے لیے بڑی بڑی چیزیں لپیٹے ہوئے ہے۔
ایسا ہی ایک منفرد انداز ہالینڈ کے ہیئرڈریسر نے اپنایا جس نے وبا سے خود کو محفوظ رکھنے کے لیے چھتری پہن لی۔ حجام نے چھتری میں سوراخ کر کے ہاتھ باہر نکالے اور دیکھنے کے لیے آنکھوں کی جگہ سے بھی سوراخ کر لیے، اس انوکھے طریقہ حجامت کو کیمرے کی آنکھ نے قید کر لیا اور یہ ویڈیو سوشل میڈیا پر وائرل ہوگئی۔
یورپ بھر میں کورونا وائرس کی تباہ کارویوں کے باعث لاک ڈاؤن ہے اور معمولات زندگی مفلوج ہو کر رہ گئے ہیں، ایسے میں لوگوں کی حجامت کرنے کے اس منفرد انداز کو سوشل میڈیا پر بے حد پسند کیا جارہا ہے اور بھرپور پذیرائی مل رہی ہے۔
