کولمبو: (ویب ڈیسک) سری لنکا ميں پيش آنیوالے دلچسپ واقعے ميں منشيات کی سمگلنگ ميں ملوث بلی جيل سے فرار ہو گئی ہے۔ قيديوں کو منشيات فراہم کرتے وقت پکڑی جانے والی بلی کو انتہائی سخت نگرانی والی جيل ميں رکھا گيا تھا۔
تفصیلات کے مطابق سری لنکا کی انتہائی سخت نگرانی والی مرکزی جيل سے ايک بلی فرار ہو گئی ہے۔ سری لنکن ذرائع ابلاغ پر پير کو نشر کردہ رپورٹوں کے مطابق ملزم بلی‘ کو دارالحکومت کولمبو کی وليکاڈا جيل ميں رکھا گيا تھا۔ فوری طور پر جيل حکام کا اس پيش رفت پر کوئی رد عمل سامنے نہيں آيا ہے۔
مذکورہ بلی کو پچھلے ہفتے کے دن قيديوں کو دو گرام ہيروئن، دو سم کارڈز اور ايک ميموری چپ پہنچاتے ہوئے رنگے ہاتھوں گرفتار کر ليا گيا تھا۔
پوليس کے مطابق يہ تمام اشياء پلاسٹک کی ايک تھيلی ميں اس کی گردن پر بندھی ہوئی تھيں۔ حراست کے بعد بلی کو جيل کے ايک خصوصی کمرے ميں رکھا گيا تھا۔
پير 3 اگست کو سری لنکا کے ارونا نامی اخبار ميں شائع ہونے والی رپورٹ ميں اس واقعے کی تفصيلات بيان کی گئيں ہيں۔ حاليہ دنوں ميں جيل حکام نے قيديوں کو منشيات، ٹيلی فون کے سم کارڈز اور ديگر ممنوعہ اشياء کی فراہمی کے بارے ميں خبردار کيا ہے۔
حکام کا کہنا ہے کہ جيل کی ديواروں کے اوپر سے يہ چيزيں قيديوں تک پہنچائی جاتی ہيں اور ايسے واقعات بڑھ رہے ہيں۔ ايشيائی ملک سری لنکا ميں منشيات ايک مسئلہ ہے۔
خبر رساں ادارے اے ايف پی نے اپنی رپورٹوں ميں لکھا ہے کہ منشيات کی سمگلنگ اور خريد و فروخت روکنے والے پوليس اہلکار اکثر اوقات خود ان چيزوں کے کاروبار ميں ملوث پائے جاتے ہيں۔ پچھلے ہفتے پوليس نے ايک باز کو پکڑا، جو کولمبو کے ايک نواحی علاقے ميں منشيات پہنچا رہا تھا۔
