برطانیہ: (ویب ڈیسک) برطانیہ سے تعلق رکھنے والے ایک جوڑا کو کچن کی آرائش کے دوران خزانہ مل گیا۔
برطانیہ کے علاقے ڈورسٹ سے تعلق رکھنے والے رابرٹ فوکس اور بیٹی (Betty) فوکس نے کچن کی مرمت کے دوران 17 ویں صدی کے ایک ہزار سے زائد سکے دریافت کئے۔
یہ جوڑا اپنے فارم ہاؤس کے کچن کے کنکریٹ کے فرش کو توڑ کر چھت کی بلندی بڑھانا چاہتا تھا، کچن کے فرش کو توڑنے کے دوران رابرٹ فوکس نے ایک شکستہ برتن دریافت کیا جو 400 سال پرانے سکوں سے بھرا ہوا تھا۔
اس دریافت کے بعد جوڑے نے مقامی حکام سے رابطہ کیا جس کے بعد سکوں کو صفائی اور شناخت کیلئے برٹش میوزیم بھیجا گیا، اب انہیں ڈورسٹ میں ایک نیلام میں فروخت کیا جائے گا اور ماہرین کو توقع ہے کہ یہ سکے 35 ہزار برطانوی پاؤنڈز میں فروخت ہوں گے۔
بیٹی فوکس نے ایک انٹرویو کے دوران بتایا کہ یہ 400 سال پرانا گھر ہے تو یہاں کافی کچھ ٹھیک کرانے کی ضرورت ہے، ہم تمام چھتوں اور فرش کو توڑ کر نئے بنا رہے ہیں۔
انہوں نے مزید کہا کہ ایک شام میں اپنے بچوں اور شوہر کے ساتھ کچن میں کھدائی کر رہی تھی تو میرے شوہر نے کہا کہ انہیں کچھ ملا ہے، انہوں نے تمام سکے ایک بالٹی میں رکھے، اگر ہم فرش نہ توڑتے تو وہ سکے اب بھی وہی چھپے ہوتے۔
انہوں نے یہ دریافت اکتوبر 2019 میں کی تھی مگر اب جا کر اس کے بارے میں بتایا گیا ہے۔
ماہرین کے مطابق یہ جیمز اول اور چارلس اول کے عہد کے طلائی اور چاندی کے سکے ہیں، ان سکوں کو 23 اپریل کو نیلام کیا جائے گا۔
