تامل ناڈو: (ویب ڈیسک) بھارت میں مرے ہوئے باپ نے بیٹے کی شادی میں شرکت کر کے سب کو حیران کردیا۔
بھارتی ریاست تمل ناڈو کے کرشنگری ضلع کے ماتھر کے قریب ایک دلچسپ اور جذباتی واقعے نے سب کو حیرت میں مبتلا کر دیا، شادی کی تقریب میں دُلہا کے آنجہانی باپ کو آسمان سے اترتے ہوئے دکھایا گیا، جس نے حاضرین کی آنکھوں کو نم کردیا۔
دراصل یہ منظر آرٹیفیشل انٹیلیجنس (اے آئی) کی مدد سے تخلیق کیا گیا تھا جس نے آنجہانی باپ کو شادی کے موقع پر موجود دکھایا گیا۔
ویڈیو میں دیکھا جا سکتا ہے کہ دلہا کے آنجہانی والد آسمان سے اترتے ہیں اور شادی کی تقریب میں شرکت کرتے ہیں، وہ اپنی بیوی اور بیٹوں سے ملتے ہیں، کھانا کھاتے ہیں اور پھر دوبارہ آسمان کی طرف لوٹ جاتے ہیں۔
یہ منظر دیکھ کر حاضرین کی آنکھیں آنسوؤں سے بھرگئیں، کیونکہ یہ ایک جذباتی لمحہ تھا جس نے سب کو حیران کر دیا۔
معلومات کے مطابق دلہا کے والد شادی سے پہلے ہی اس دنیا سے رخصت ہوگئے تھے لیکن ان کے بیٹے نے یہ یقینی بنایا کہ ان کے والد ان کی شادی کی تقریب میں موجود رہیں، اس کیلئے مصنوعی ذہانت کا استعمال کیا گیا جس کے ذریعے آنجہانی باپ کو ویڈیو میں زندہ کر دیا گیا۔
یہ ویڈیو نہ صرف جذباتی تھی، بلکہ اس نے مصنوعی ذہانت کے مثبت استعمال کی ایک نئی مثال بھی پیش کی۔
ویڈیو دیکھنے والوں نے اسے ’’واہ کیا ہو رہا ہے‘‘ کے الفاظ سے نوازا اور کئی لوگوں نے اسے ایک خوبصورت اور دل کو چھو لینے والا اقدام قرار دیا۔
