اتر پردیش: (ویب ڈیسک) بھارت میں نوجوان نے زیادہ پنیر نہ ملنے پر شادی کی تقریب میں موجود لوگوں پر منی بس چڑھا کر متعدد افراد کو زخمی کر دیا۔
بھارتی میڈیا کی رپورٹس کے مطابق پہاڑی گاؤں کا رہائشی دلہا راجناتھ یادو بارات لے کر ہفتے کی شب بھارتی ریاست اتر پردیش کے گاؤں حمید پور پہنچا جہاں تقریب میں گاؤں کے ایک نوجوان نے مزید پنیر کا مطالبہ کیا تو دلہن کے والد نے انکار دیا۔
پنیر کے معاملے پر جھگڑا تلخ کلامی سے ہاتھا پائی میں اُسوقت تبدیل ہوا جب دلہن کے والد نے غصے میں آ کر نوجوان کے سر پر بڑا چمچہ دے مارا۔
نوجوان نے انتقام لیتے ہوئے شادی کی تقریب میں موجود لوگوں پر منی بس چڑھا دی جس کے نتیجے میں دلہن کے والد اور چچا سمیت پانچ افراد زخمی ہوگئے، زخمیوں میں سے تین کی حالت تشویشناک ہے۔
پولیس حکام نے بتایا کہ گاؤں کا ایک نوجوان شادی کی دعوت میں شریک ہوا جس کا کھانے کو لے کر جھگڑا ہوگیا، غصے میں آکر اس نے تقریب پر منی بس چڑھا دی جس سے 5 افراد زخمی ہوگئے، ملزم گاڑی سمیت موقع سے فرار ہوگیا جس کی تلاش جاری ہے۔
واقعے کے بعد شادی کی تقریب عارضی طور پر روک دی گئی جو اگلے دن پولیس کی موجودگی میں مکمل کی گئی۔
