استنبول:(ویب ڈیسک) ترکیہ کے شہر استنبول میں تقسیم سکوائر کے قریب دھماکا ہوا جس سے 6 افراد جاں بحق ہوگئے جبکہ 50 سے زائد زخمی ہیں۔
غیر ملکی میڈیا رپورٹس کے مطابق خوفناک فوٹیج میں لاشیں زمین پر بکھری ہوئی دکھائی دیں، شہر کے وسط میں جب دھماکا ہوا تو سڑک خریداروں سے کھچا کھچ بھری ہوئی تھی۔
— Amichai Stein (@AmichaiStein1) November 13, 2022
استنبول دھماکے کے بعد ترک صدر طیب اردوان نے پریس کانفرنس کرتے ہوئے کہا کہ دھماکا دہشت گردوں کی کارروائی لگ رہا ہے، ابتدائی تحقیقات میں کسی خاتون کے ملوث ہونے کی جانب اشارہ جاتا ہے، ترکیہ کو دہشت گردی کے ذریعے شکست دینے کی کوشش ناکام ہوگی، واقعے میں ملوث افراد کو پکڑیں گے اور قرار واقع سزا دیں گے۔
وزیراعظم شہباز شریف نے کہا کہ ترکیہ کی استقلال سٹریٹ میں دھماکے کی شدید مذمت کرتے ہیں، قیمتی انسانی جانوں کے ضیاع پر بے حد افسوس ہے، بچوں سمیت واقعے میں زخمی ہونے والوں کی جلد صحت یابی کی دعا کرتے ہیں، پاکستان ترکیہ کے عوام اور حکومت سے مکمل یک جہتی کا اظہار کرتا ہے، ہر طرح کی دہشت گردی قابل مذمت ہے۔
انہوں نے قیمتی جانوں کے ضیاع پر گہرے افسوس کا اظہار کرتے ہوئے جاں بحق ہونے والوں کیلئے دعائے مغفرت، ورثا کیلئے صبر جمیل اور زخمی افراد کی جلد صحتیاب ہونے کی دعا کرتے ہوئے کہا کہ دکھ کی اِس گھڑی میں ترکیہ کی عوام کے ساتھ ہیں۔
