لندن: (دنیا نیوز) برطانوی شہزادی کیٹ مڈلٹن کینسر کے عارضے میں مبتلا ہو گئیں جس کی باقاعدہ طور پر تصدیق بھی کر دی گئی ہے۔
شہزادی آف ویلز کیٹ مڈلٹن نے ویڈیو پیغام میں کینسر کا انکشاف کرتے ہوئے کہا کہ موذی مرض کے بعد گزشتہ چند ماہ ہمارے خاندان کے کرب میں گزرے، علاج جاری ہے اور میں ڈاکٹرز کی ٹیم کے علاج سے مطمئن ہوں، میری صحت پہلے سے بہتر ہے، میں آپ کی دعاؤں کی مشکور ہوں۔
شہزادی کیٹ مڈلٹن نے مزید کہا ہے کہ جنوری میں لندن میں میرے معدے کی سرجری ہوئی جوکہ کامیاب رہی، اس وقت کینسر کی تشخیص نہیں ہوئی تھی تاہم آپریشن کے بعد ہونے والے مختلف ٹیسٹ میں پتہ چلا کہ میں کینسر میں مبتلا ہوں۔
انہوں نے کہا کہ تشخیص کے بعد میری میڈیکل ٹیم نے مشورہ دیا کہ مجھے کیموتھراپی کا کورس کرنا چاہیے اور میں اب اس علاج کے ابتدائی مراحل میں ہوں، کینسر کا پتہ چلنا بڑا صدمہ تھا، پہلے دو ماہ بہت مشکل سے گزرے تاہم میں اب ٹھیک ہوں اور ہر دن مضبوط ہو رہی ہوں۔
واضح رہے کہ گزشتہ کئی ہفتوں سے سوشل میڈیا پر شہزادی کیٹ مڈلٹن کی صحت کے حوالے سے قیاس آرائیاں اور سازشی خیالات پوسٹ کیے جا رہے تھے، کیٹ مڈلٹن سے قبل فروری میں برطانوی بادشاہ چارلس سوم کے کینسر میں مبتلا ہونے کی خبر سامنے آئی تھی۔
