ٹورنٹو : (دنیا نیوز) سکھ فار جسٹس نے بھارتی فوج کے مساجد پر میزائل حملوں میں شہید ہونے والے پاکستانیوں کے خاندانوں کے لیے 35 لاکھ روپے کی امداد کا اعلان کر دیا۔
سکھ فار جسٹس کے رہنما گرپتونت سنگھ پنوں نے کہا کہ سکھ فار جسٹس بھارت کو معاشی طور پر تباہ کرے گا، جنگ جاری رکھے گا جب تک سکھ بھارت کی ریاست کو پارہ پارہ نہیں کر دیتے۔
گرپت ونت سنگھ پنوں کا کہنا تھا کہ مودی کی بھارتی فوج نے مساجد پر میزائل حملے کیے، کھلے عام اسلام کے خلاف جنگ کا اعلان کیا، پاکستان کے ساتھ جنگ شروع کی، خالصتان کے حامی سکھ پاکستان کے شہیدوں کے کندھے سے کندھا ملا کر کھڑے ہیں۔
بھارت کے مساجد پر میزائل حملوں اور ننکانہ صاحب پر ناکام ڈرون حملے کا حوالہ دیتے ہوئے سکھ فار جسٹس کے جنرل کونسل گرپتونت سنگھ پنوں نے انتباہ کیا کہ مودی نے مسلمانوں اور سکھوں کے خلاف جنگ کا اعلان کیا ہے، بھارت کو اس کی قیمت ادا کرنی پڑے گی۔
انہوں نے تنبیہ کی کہ سکھ فار جسٹس بھارت کو معاشی طور پر تباہ کرے گا اور ممبئی اسٹاک ایکسچینج کو گرا کر بھارتی معیشت کو مفلوج کر دے گا جو بھارتی فوج کو فنڈز فراہم کرتی ہے۔
