نئی دہلی : (دنیا نیوز) پاکستان کے خلاف آپریشن سندور کی ناکامی کے بعد بھارتی حکومت شدید دباؤ کا شکار ہو گئی، عوامی ردعمل کے پیش نظر اہم وزراء اور سیاستدانوں کی سکیورٹی میں غیر معمولی اضافہ کر دیا۔
بھارتی اخبار کے مطابق دہلی پولیس نے وزیر خارجہ جے شنکر، دہلی کی وزیراعلیٰ ریکھا گپتا اور سیکرٹری خارجہ وکرم مسری سمیت بی جے پی کے 25 اہم رہنماؤں کی سیکیورٹی مزید سخت کرنے کا فیصلہ کیا ہے۔
بی جے پی کے دیگر نمایاں وزراء جن کی سیکیورٹی بڑھائی گئی ہے[ ان میں جے پی نڈا، بھوپندر یادو، نشی کانت دوبے اور سدھانشو تریویدی شامل ہیں۔
ان تمام شخصیات پر تعینات سیکیورٹی اہلکاروں کو فائرنگ اور فوری طبی امداد کی خصوصی تربیت بھی دی جائے گی، دہلی پولیس نے سیکیورٹی خدشات پر خصوصی اجلاس بھی طلب کیا ہے۔
دفاعی ماہرین کا کہنا ہے کہ مودی سرکار کے جنگی جنون اور غیر ذمہ دارانہ پالیسیوں نے نہ صرف خطے کو غیر مستحکم کیا بلکہ خود بھارتی قیادت کی زندگیوں کو بھی خطرات سے دوچار کر دیا ہے۔
تجزیہ نگاروں کے مطابق یہ صورت حال بھارت میں بڑھتے ہوئے داخلی دباؤ اور عوامی بےچینی کی واضح علامت ہے، پاکستان کے خلاف زبانی جمع خرچ کے بجائے بھارتی قیادت کو خطے میں امن کے لیے سنجیدہ رویہ اختیار کرنا چاہیے۔
