تہران: (ویب ڈیسک) ایران کے صدر مسعود پزشکیان کی گاڑی غیر معیاری پٹرول کے سبب خراب ہو گئی جس سے صدر کو ٹیکسی میں سفر کرنا پڑ گیا۔
ایرانی میڈیا کے مطابق ایرانی صدر تبریز جا رہے تھے، اس دوران قافلے کی 3 گاڑیوں میں قزوین صوبے کے پیٹرول سٹیشن سے پٹرول ڈلوایا گیا تاہم پانی ملے پٹرول کے باعث گاڑیاں خراب ہوگئیں اور قافلہ درمیان میں رُک گیا جس کے بعد ایرانی صدر نے مقامی حکام کو اطلاع دیے بغیر خود ہی ایک نجی ٹیکسی کا انتظام کیا اور تبریز پہنچے۔
حکومتی عہدیدار نے بتایا کہ تحقیقات کے مطابق مذکورہ پٹرول پمپ پانی ملا ناقص پٹرول فراہم کر رہا تھا اور اس کے خلاف پہلے بھی اسی قسم کی خلاف ورزیوں کی شکایات درج ہو چکی ہیں۔
ایرانی نیشنل آئل پروڈکٹس ڈسٹری بیوشن کمپنی نے بھی تصدیق کی ہے کہ اس پٹرول پمپ کے خلاف ماضی میں ایندھن کے معیار پر شکایات موصول ہو چکی تھیں، تاہم یہ واضح نہیں کیا گیا کہ وہ سٹیشن اب تک کیوں فعال ہے۔
اب تک صدارتی دفتر یا وزارتِ تیل کی جانب سے اس واقعہ پر کوئی سرکاری بیان جاری نہیں کیا گیا۔
