لندن: (ویب ڈیسک) انسانی حقوق کی تنظیم ایمنسٹی انٹرنیشنل نے کہا ہے کہ اسرائیل غزہ کے فلسطینیوں کو دانستہ بھوک سے مار رہا ہے۔
عالمی میڈیا کی رپورٹ میں بے گھر فلسطینیوں اور غذائیت کی قلت کے شکار بچوں کا علاج کرنے والے طبی عملے کی شہادتوں کا حوالہ دیتے ہوئے ایمنسٹی نے کہا کہ اسرائیل غزہ میں فاقہ کشی کی سوچی سمجھی مہم چلا رہا ہے۔
اس گروپ نے اسرائیل پر الزام لگایا کہ وہ فلسطینیوں کی صحت، بہبود اور معاشرتی تانے بانے کو منظم طریقے سے تباہ کر رہا ہے۔
میڈیا رپورٹ کے مطابق ایمنسٹی نے کہا کہ فلسطینیوں کو جسمانی طور پر تباہ کرنے کے جو منصوبے اور پالیسیاں اسرائیل نے گزشتہ 22 ماہ کے دوران وضع کئے اور ان پر عمل درآمد کیا ہے، یہ حالات ان کا مطلوبہ نتیجہ ہیں اور یہ فلسطینیوں کی جاری نسل کشی کا لازمی حصہ ہے۔
ایمنسٹی کی یہ رپورٹ حالیہ ہفتوں میں ہونے والے انٹرویوز پر مبنی ہے جو تین عارضی کیمپوں میں پناہ گزین غزہ کے 19 بے گھر باشندوں اور ساتھ ہی علاقے کے دو ہسپتالوں میں دو طبی عملے سے بھی کئے گئے۔
