ایریزونا: (دنیا نیوز) امریکی صدر ڈونلڈ ٹرمپ کے ساتھی چارلی کرک کی اہلیہ نے اپنے شوہر کے قاتل کو معاف کر دیا۔
امریکی ریاست ایریزونا میں چارلی کرک کی یاد میں تعزیتی جلسے کا انعقاد کیا گیا جس میں صدر ٹرمپ نے بھی شرکت کی۔
امریکی صدر ٹرمپ نے کرک کی بیوہ ایریکا کو حوصلہ دیا اور چارلی کرک کو ’امریکی آزادی کا شہید‘ قرار دیتے ہوئے ان کے مشن کو آگے بڑھانےکے عزم کا اظہار کیا۔
اس موقع پر اریکا کرک اپنے شوہر کو خراج عقیدت پیش کرتے ہوئے آبدیدہ ہو گئیں اور خطاب میں قاتل کو معاف کرنے کا اعلان کیا۔
ایریکا کرک نے کہا ہے کہ نفرت کا جواب نفرت نہیں بلکہ معافی ہے۔
چارلی کرک کا قتل
امریکی صدر ڈونلڈ ٹرمپ کے قریبی ساتھی اور اسرائیل نواز چارلی کرک کو 11 ستمبر کو یوٹا یونیورسٹی میں تقریر کے دوران گولی مار دی گئی تھی۔
عینی شاہدین نے غیر ملکی میڈیا سے گفتگو میں بتایا تھا کہ چارلی کو اس وقت گولی ماری گئی جب وہ گن کنٹرول اور ہجوم پر فائرنگ کے موضوع پر بات کر رہے تھے۔
چارلی کرک ایک قدامت پسند شخصیت تھے اور وہ امریکی صدر کے کافی قریبی ساتھی سمجھے جاتے تھے۔
رپورٹس کے مطابق چارلی کرک ٹرننگ پوائنٹ یو ایس اے نامی تنظیم کے بانی بھی تھے، 2012 میں قائم کی گئی یہ تنظیم تعلیمی اداروں میں قدامت پسند نظریات کو فروغ دیتی ہے۔
