اسلام آباد:(دنیا نیوز) وفاقی وزیر صحت مصطفیٰ کمال نے یونیورسل ہیلتھ کوریج سے متعلق اجلاس بلانے کا اعلان کردیا۔
وفاقی دارالحکومت میں مصطفیٰ کمال سے ورلڈ بینک کے اعلیٰ سطح وفد نے ملاقات کی، جس میں پاکستان کے نظامِ صحت کو مضبوط بنانے کے لیے جاری اقدامات اور درپیش چیلنجز پر تبادلہ خیال کیا گیا۔
اُنہوں نے نیشنل ہیلتھ سپورٹ پروگرام کے مؤثر نفاذ کو یقینی بنانے کے لیے ورلڈ بینک پروگرام کی مدت میں ایک سال توسیع کی ضرورت پر زور دیا۔
وفاقی وزیر صحت کا کہنا تھا کہ ورلڈ بینک کی درخواست پر انٹر منسٹریل ہیلتھ اینڈ پاپولیشن کونسل کو فوری طور پر دوبارہ فعال کرنے اور اسی ہفتے بین الصوبائی وزارتی اجلاس طلب کرنے کی ہدایت کی تاکہ پالیسی سطح پر مربوط مشاورت کو یقینی بنایا جا سکے۔
دوران گفتگو مصطفیٰ کمال نے اِسی ہفتے یونیورسل ہیلتھ کوریج سے متعلق اجلاس بلانے کا بھی اعلان کیا، تاکہ ملک بھر میں صحت کی سہولیات کی فراہمی کے دائرہ کار کو تیز رفتاری سے بڑھایا جا سکے۔
اُنہوں نے گلوبل فنانسنگ فیسیلٹی کے تحت خواتین، بچوں اور نوعمر افراد کی صحت و غذائیت کے حوالے سے فوکل پرسن کی نامزدگی کی ہدایت بھی دی۔
ورلڈ بینک وفد نے آئندہ 2 سے 3 ماہ میں ڈونر کانفرنس کے انعقاد کی تجویز پیش کی، جس کا مقصد وفاقی وزیر کے آئندہ 2 سے 3 سالہ ویژن کو اُجاگر کرنا اور پاکستان کے شعبہ صحت میں سرمایہ کاری کے مواقع تلاش کرنا ہے۔
وفاقی وزیر صحت نے اِس تجویز کا خیرمقدم کرتے ہوئے وزارت کی جانب سے بھرپور تعاون کی یقین دہانی کرائی اور کہا کہ وزارت صحت اور ورلڈ بینک کے درمیان قریبی رابطے اور معلومات کے تبادلے کو مزید فروغ دیا جائے گا۔
ملاقات کے آخر میں اُنہوں نے اِس عزم کا اعادہ کیا کہ پاکستان کے نظام صحت کو بہتر بنانے کے لیے باہمی تعاون کو مزید مؤثر اور مضبوط بنایا جائے گا۔
