ریاض: (ویب ڈیسک) سعودی وزیر خارجہ شہزادہ فیصل بن فرحان اور امریکی ہم منصب مارکو روبیو کے درمیان ٹیلی فونک رابطہ ہوا۔
عالمی میڈیا کی رپورٹ کے مطابق سعودی وزیر خارجہ شہزادہ فیصل بن فرحان کو امریکی ہم منصب مارکو روبیو کی طرف سے ایک ٹیلی فون کال موصول ہوئی جس میں انہوں نے دوطرفہ تعلقات، علاقائی اور بین الاقوامی صورتحال کی تازہ ترین پیشرفت اور اس حوالے سے کی جانے والی کوششوں پر تبادلہ خیال کیا۔
امریکی ہم منصب سے گفتگو کے دوران سعودی وزیر خارجہ شہزادہ فیصل نے فلسطینیوں کے مصائب کو ختم کرنے اور جاری تشدد کے چکر کو روکنے کے لیے اپنے ملک کے موقف کی تجدید کی، انہوں نے زور دیا کہ فلسطینی مسئلہ تمام بین الاقوامی فورمز پر مملکت کی ترجیحات میں سرفہرست ہے۔
شہزادہ فیصل بن فرحان نے اس بات پر بھی زور دیا کہ ان کا ملک ایک آزاد فلسطینی ریاست کے قیام سے شروع ہونے والے ایک منصفانہ حل کو حاصل کرنے کے لیے تمام کوششیں کرے گا۔
یاد رہے کہ دونوں وزراء کے درمیان یہ کال ایسے وقت میں ہوئی جب نیویارک میں اقوام متحدہ کی جنرل اسمبلی کا 80 واں اجلاس شروع ہوچکا ہے۔
واضح رہے کہ شہزادہ فیصل بن فرحان اس اعلیٰ سطح کی بین الاقوامی کانفرنس میں مملکت کے وفد کی قیادت کر رہے ہیں، یہ کانفرنس فلسطینی مسئلے کے پرامن حل اور رہنماؤں کی سطح پر دو ریاستی حل کے نفاذ کے لیے ہے، وہ دو ریاستی حل کو نافذ کرنے کے لیے بین الاقوامی اتحاد کے اعلیٰ سطح کے وزارتی اجلاس میں بھی شرکت کر رہے ہیں۔
