واشنگٹن: (دنیا نیوز) امریکا کے صدر ڈونلڈ ٹرمپ نے کہا ہے کہ بائیڈن انتظامیہ نے قاتلوں کو امریکا میں داخلے کی اجازت دی تھی، ہم غیرقانونی تارکین وطن کوملک میں داخل نہیں ہونے دیں گے۔
امریکا کے صدر ڈونلڈ ٹرمپ نے اپنی قوم سے خطاب کرتے ہوئے کہا ہے کہ مجھے کرپٹ نظام ختم کرنے کا بھاری مینڈیٹ ملا ہے، ایک سال میں ہم نے جو حاصل کیا، وہ کوئی حاصل نہیں کرسکا، ہم نے10 ماہ میں 8 جنگیں رکوائیں، ایران کے جوہری خطرے کو تباہ کیا اور غزہ کی جنگ ختم کر کے تین ہزار سال میں پہلی بار امن قائم کیا۔
ان کا کہنا تھا کہ امریکا کو قانون ساز نہیں، نئے صدر کی ضرورت تھی، امریکا بدترین سے بہترین ہوگیا، امریکا میں اشیاء کی قیمتوں میں نمایاں کمی کی ہے، میرے دور میں امریکیوں کی تنخواہوں میں نمایاں اضافہ ہوا، امریکا میں اس وقت برسرروزگار افراد کی تعداد ماضی سے کہیں زیادہ ہے۔
ٹرمپ کا کہنا تھا کہ ایک سال پہلے امریکا مردہ تھا، ناکامی کے دہانے پر تھا، کھربوں ڈالر کی سرمایہ کاری ممکن بنائی، ٹیکسوں میں کمی کے نتائج اگلے سال نظر آئیں گے، کھربوں ڈالر کی سرمایہ کاری ممکن بنائی، ٹیرف کی مدد سے معیشت کو بہتر بنایا۔
صدر ٹرمپ نے بائیڈن دور کی گرین انرجی سکیم پر تنقید کرتے ہوئے کہا کہ بائیڈن دور میں غیرقانونی امیگرینٹس نے نوکریاں لیں، میرے دور میں ساری نئی نوکریاں امریکا میں پیدا ہونے والوں کو ملیں، امریکا کو ایک بار پھر عظیم بنا رہے ہیں، بارڈر محفوظ بنادیا۔
امریکا کے صدر ڈونلڈ ٹرمپ نے مزید کہا کہ بائیڈن پالیسیاں دوبارہ نافذ نہیں ہونے دیں گے، امریکا میں ہاؤسنگ شعبے میں اصلاحات کی جائیں گی، انہوں نے امریکی فوجیوں کو کرسمس پر فی کس 1776 ڈالر دینےکا اعلان کیا۔
