دبئی: (دنیا نیوز) دبئی کے مختلف علاقوں میں گرج چمک کے ساتھ موسلادھار بارش کے بعد معمولات زندگی متاثر ہو گئے ہیں۔
شدید بارش اور خراب موسمی صورتحال کے پیش نظر ورک فرام ہوم پالیسی نافذ کر دی گئی جبکہ پرائیویٹ سیکٹر کو بھی ریموٹ ورک اختیار کرنے کی ہدایت جاری کی گئی ہے، صرف انتہائی ضروری عملہ ہی دفاتر میں حاضری دے گا۔
محکمہ موسمیات کی جانب سے دبئی اور ابو ظہبی میں شدید موسم کی وارننگ بھی جاری کی گئی ہے۔
خراب موسم کے باعث دبئی کے معروف تفریحی مقامات گلوبل ویلیج اور عین دبئی کو عارضی طور پر بند کر دیا گیا ہے جبکہ سکائی ڈائیو کی تمام سرگرمیاں بھی معطل کر دی گئی ہیں۔
موسم کی خرابی اور تیز بارش کے باعث فلائٹ آپریشن بھی متاثر ہوا ہے، دبئی ایئرپورٹ پر آنے اور جانے والے متعدد پروازیں منسوخ جبکہ کئی تاخیر کا شکار ہیں۔
دبئی پولیس نے شہریوں کو غیر ضروری سفر سے گریز کی ہدایت جاری کرتے ہوئے کہا ہے کہ احتیاطی تدابیر اختیار کی جائیں، اسی طرح دبئی ایئرپورٹ انتظامیہ نے مسافروں کو ممکنہ تاخیر کے پیش نظر وقت سے پہلے ایئرپورٹ پہنچنے کا مشورہ دیا ہے۔
حکام کے مطابق دبئی میں موسم آج رات سے بتدریج بہتر ہونے کی توقع ہے۔
