سیوئل: (ویب ڈیسک) جنوبی کوریا کے صدر لی جے میونگ نے کہا ہے کہ وہ امریکا اور شمالی کوریا کے درمیان مذاکرات کی بحالی کیلئے سہولت کاری کیلئے تیار ہیں۔
غیرملکی خبر ایجنسی کے مطابق جنوبی کوریا کے صدر لی جے میونگ نے کہا کہ وہ شمالی کوریا اور امریکا کے درمیان طویل عرصے سے تعطل کا شکار مذاکرات کی بحالی کی پر زور حمایت کریں گے تاکہ جزیرہ نما کوریا میں امن بحال کرنے میں مدد ملے۔
نئے سال کے آغاز میں اپنے خطاب میں جنوبی کوریا کے صدر کا کہنا تھا کہ گزشتہ ملاقات میں امریکی صدر نے شمالی کوریائی سربراہ سے ملاقات کی خواہش کا اظہار کیا تھا، شمالی کوریا کی جانب سے ملاقات کی اس خواہش کو مسترد کردیا گیا تھا۔
صدر لی جے میونگ نے مزید بتایا کہ ان کا ملک جنگی کشیدگی میں کمی کیلئے سفارتکاری کا حامی ہے، وہ کشیدگی اور جنگی تناؤ کے ماحول کو پائیدار ترقی سے تبدیل کرنا چاہتے ہیں۔
