اسلام آباد: (دنیا نیوز) ایشیائی ممالک میں موسمیاتی تبدیلی کے خطرات سے نمٹنے کیلئے ایشیائی ترقیاتی بینک نے "کلائمیٹ چینج فنانسنگ" کے نئے پروگرام کا اعلان کردیا۔
ایشیائی ترقیاتی بینک کے کلائمنٹ چینج فنانسنگ پروگرام کے تحت موسمیاتی تبدیلی سے متاثرہ ممالک کو 15 ارب ڈالر تک کے نئے قرضے دیئے جائیں گے۔
ایشیائی ترقیاتی بینک نے ’’کلائمیٹ چینج فنانسنگ‘‘ کیلئے نئے پروگرام کا اعلان کردیا، اے ڈی بی کا کہنا ہے کہ آئی ایف کیپ فنانسنگ پروگرام کے تحت 2030 تک 100 ارب ڈالرز کے فنڈز کا منصوبہ ہے۔
ایشیائی ترقیاتی بینک نے مزید کہا ہے کہ ایشیاء پیسفک ریجن میں ایک سال سے جاری موسمیاتی آفات کی شدت میں اضافہ متوقع ہے، ڈونرز ممالک کی جانب سے ہر ایک ڈالر کے بدلے 5 ڈالرز کا انتظام کیا جائے گا، متاثرہ ممالک کو 3 ارب ڈالرز کی گارنٹی کی صورت میں 15 ارب ڈالرز کے قرضے دیئے جائیں گے۔
اے ڈی بی نے ڈنمارک، جاپان، کوریا، برطانیہ اور امریکا کو اہم ابتدائی پارٹنر قرار دیا ہے، ایشیائی ترقیاتی بینک کا کہنا ہے کہ موسمیاتی منصوبوں کیلئے فنڈز کی فراہمی کیلئے ان ممالک سے بات چیت جاری ہے، عالمی مالیاتی اداروں، نجی شعبے، مخیر اداروں سے بھی رابطہ ہے۔
