اسلام آباد: (دنیا نیوز) سرمایہ کاری میں سنگ میل، اسلام آباد میں آذربائیجان و پاکستان چیمبر آف کامرس انڈسٹری کا قیام و افتتاح ہو گیا۔
وفاقی وزیر سرمایہ کاری بورڈ، نجکاری و مواصلات عبدالعلیم خان چیمبر نے افتتاحی تقریب میں مہمان خصوصی شرکت کی۔
عبدالعلیم خان نے کہا کہ آج کا دن پاکستان اور آذربائیجان دونوں ممالک اور بزنس کمیونٹی کیلئے انتہائی اہم ہے، پاکستان اور آذربائیجان کا تعلق دونوں ممالک کے عوام کے دلوں سے منسلک ہے۔
وفاقی وزیر عبدالعلیم خان نے آذربائیجان کے سفیر خضر فرہادوف اور اُن کی ٹیم کو اس اہم کامیابی پر مبارکباد دی اور کہا کہ اسلام آباد میں آذربائیجان کے ساتھ چیمبر آف کامرس انتہائی اہمیت کا حامل ہوگا۔
انہوں نے کہا کہ پائیدار ترقی کا انحصار سٹریٹجک تعلقات اور تعاون پر ہے، آذربائیجان اور پاکستان کی بزنس کمیونٹی ایک ہی جگہ سرمایہ کاری کے امور طے کر سکتے ہیں، پاکستان اور آذربائیجان چیمبر آ ف کامرس اینڈ انڈسٹری کا قیام خوش آئند امر ہے۔
وفاقی وزیر سرمایہ کاری نے کہا کہ مشترکہ تہذیب اور تعلقات میں گرمجوشی پاکستان اور آذربائیجان کا خاصہ ہے، آزمائش کی ہر گھڑی میں دونوں ممالک ایک دوسرے کے ساتھ ہمیشہ جڑے رہے۔
صدر ایف پی سی سی آئی عاطف اکرام اور افتتاحی چیمبر کے چیئرمین احسن ظفر بختاوری نے بھی تقریب میں شرکت کی۔
سفیر آذربائیجان خضر فرہادوف نے کہا کہ وفاقی وزیر عبدالعلیم خان آذربائیجان کے لئے گہرے برادرانہ جذبات رکھتے ہیں، پاکستان اور آذربائیجان دو ارب ڈالر کی سرمایہ کاری کیلئے کوشش کر رہے ہیں۔
