اسلام آباد: (دنیا نیوز) پاکستان کے دورے پر آئے ورلڈ بینک کے 9 رکنی وفد نے تربیلا ڈیم کے توسیعی منصوبوں کا تفصیلی دورہ کیا، چیئرمین واپڈا انجینئر لیفٹیننٹ جنرل سجاد غنی (ریٹائرڈ) بھی وفد کے ہمراہ تھے۔
تربیلا ڈیم، تربیلا ہائیڈل پاور سٹیشن اور چوتھے توسیعی منصوبے کو ورلڈ بنک کی مالی معاونت سے مکمل کیا گیا ہے، ورلڈ بنک زیرتعمیر تربیلا پانچویں توسیعی منصوبے کے لئے بھی 390 ملین امریکی ڈالر فراہم کر رہا ہے۔
اس موقع پر چیئرمین واپڈا نے کہا کہ ورلڈ بنک اور واپڈا گزشتہ 6 دہائیوں سے ترقی میں شراکت دار ہیں، اُمید ہے ورلڈ بنک پاکستان کی ترقی کے لئے آبی وسائل کی تعمیر کے ذریعے واپڈا کی معاونت جاری رکھے گا۔
ورلڈ بینک کے وفد نے تربیلا ڈیم سمیت دیگر پن بجلی منصوبوں کی تعمیر میں واپڈا کے کردار کی تعریف کی، بریفنگ میں بتایا گیا کہ تربیلا ڈیم 1974 میں اپنی تعمیر سے اب تک پاکستان کی معاشی اور معاشرتی ترقی میں کلیدی کردار ادا کر رہا ہے۔
.jpg)
تربیلا ڈیم اپنی تکمیل کے بعد زراعت کے لئے 411 ملین ایکڑ فٹ پانی مہیا کر چکا ہے، تربیلا ہائیڈل پاور سٹیشن سے نیشنل گرڈ کو مجموعی طور پر 597 ارب 30 کروڑ 90 لاکھ یونٹ سستی بجلی فراہم کی جا چکی ہے۔
تربیلا ڈیم قومی اقتصادیات کو 411 ارب امریکی ڈالر کے مساوی فوائد پہنچا چکا ہے، تربیلا چوتھا توسیعی منصوبہ ورلڈ بنک کا فلیگ شپ پراجیکٹ ہے، تربیلا چوتھے توسیعی منصوبے سے نیشنل گرڈ کو 27 کروڑ53 لاکھ 10 ہزار یونٹ بجلی مہیا ہو چکی ہے۔
بریفنگ کے دوران بتایا گیا کہ تربیلا پانچویں توسیعی منصوبے کی تمام اہم سائٹس پر تعمیراتی کام جاری ہے، تربیلا پانچویں توسیعی منصوبے سے بجلی کی پیداوار 2026 میں شروع ہوگی۔
ورلڈ بنک داسو ہائیڈرو پاور پراجیکٹ کے لئے ایک ارب 58 کروڑ 80 لاکھ امریکی ڈالر کی مالی معاونت فراہم کر رہا ہے، داسو ہائیڈرو پاور پراجیکٹ سے بجلی کی پیداوار کا آغاز 2026 میں ہوگا۔
