اسلام آباد: (دنیا نیوز) وزیراعظم شہباز شریف نے ملک میں ای کامرس کو مزید فروغ دینے کا لائحہ عمل تیار کرنے کیلئے کمیٹی تشکیل دینے کا حکم دے دیا۔
وزیراعظم محمد شہباز شریف سے بین الاقوامی ای کامرس کمپنی علی بابا گروپ کی انٹرنیشنل مارکیٹس کے صدر جیمز ڈونگ کی قیادت میں علی بابا گروپ کے 6 رکنی وفد نے ملاقات کی، جیمز ڈونگ نے بین الاقوامی سطح پر ای کامرس کے ذریعے تجارت میں پاکستانی کاروباری برادری کے کلیدی کردار کو سراہا۔
اس موقع پر وزیراعظم شہباز شریف نے کہا کہ علی بابا گروپ جیسے ای کامرس پلیٹ فارمز پر اس وقت تین لاکھ سے زائد پاکستانی مقامی طور پر تیار کردہ مصنوعات فروخت کر رہے ہیں، عصر حاضر میں ای کامرس برآمدات میں خاطر خواہ اضافے کا ایک بہت بڑا ذریعہ ہے۔
— Government of Pakistan (@GovtofPakistan) July 10, 2025
وزیراعظم نے حکام کو ہدایت کی کہ ای کامرس پلیٹ فارمز پر مصنوعات فروخت کرنے والے پاکستانی کاروبار کی تعداد میں مزید اضافے کیلئے اقدامات کیے جائیں، ای کامرس حکومت کے برآمدات پر مبنی معیشت کے ویژن کی تکمیل کے عمل کا ایک انتہائی اہم عنصر ہے۔
علی بابا گروپ کی انٹرنیشنل مارکیٹس کے صدر جیمز ڈونگ نے کہا کہ علی بابا کے پلیٹ فارم پر پاکستانی ٹیکسٹائل مصنوعات کی مانگ اور فروخت سب سے ذیادہ ہے، پاکستان میں ای کامرس کو مزید وسعت دینے کی لا محدود استعداد موجود ہے۔
جیمز ڈونگ نے علی بابا گروپ پر پاکستانی تاجروں کی تعداد بڑھانے کے لیے انٹرپرنیورز کی ای کامرس میں تکنیکی تربیت میں گہری دلچسپی کا اظہار کیا، اجلاس میں وفاقی وزیر آئی ٹی شزہ فاطمہ خواجہ، چئیرمین ایف بی آر اور متعلقہ اداروں کے اعلیٰ افسران شریک تھے۔
