ماسکو، اسلام آباد: (ویب ڈیسک) پاکستان اور روس نے کراچی میں پاکستان سٹیل ملز کی بحالی کے لیے پروٹوکول پر دستخط کر دیے۔
وزارت صنعت و پیداوار کے اعلامیے کے مطابق ماسکو میں وزیراعظم کے معاون خصوصی برائے صنعت و پیداوار ہارون اختر خان کی قیادت میں روس کے ساتھ وزارتِ صنعت و پیداوار کے وفد کا معاہدہ ہوا ہے۔
پاک روس معاہدے میں پاکستان سٹیل ملز کو جدید بنانے کا فیصلہ کیا گیا ہے، پاکستان سٹیل ملز کی بحالی کے لیے روس کے ساتھ شراکت داری اور نئی صنعتی تاریخ رقم ہوگی۔
پاکستان کے سیکرٹری صنعت و پیداوار سیف انجم اور روس کی انڈسٹریل انجینئرنگ ایل ایل سی کے ڈی جی وادیم ویلیچکو نے معاہدے پر دستخط کیے۔
وزیراعظم کے معاون خصوصی ہارون اختر خان نے کہا کہ 1971 میں سوویت یونین کے تعاون سے قائم پاکستان سٹیل ملز ایک بار پھر روس کے ساتھ بحال ہوگی، پاکستان سٹیل ملز کی بحالی وزیراعظم شہباز شریف کے وژن کی عکاسی کرتی ہے، وزیر اعظم کے صنعتی ترقی کے وژن سے پاکستان سٹیل ملز کو بحال کیا جائے گا۔
ہارون اختر خان نے کہا کہ روس کے ساتھ معاہدہ پاکستان سٹیل ملز کی ترقی اور صنعتی مستقبل کے لیے سنگ میل ہے، پاکستان سٹیل ملز کی بحالی سے روزگار اور صنعتی پیداوار میں اضافے کی توقع ہے۔
