کراچی: (دنیا نیوز) سندھ کے سینئر وزیر شرجیل انعام میمن سے ایشین ڈویلپمنٹ بینک کے اعلیٰ سطح وفد نے ملاقات کی ہے۔
ملاقات کے دوران ریڈ لائن بی آرٹی منصوبے پر جاری ترقیاتی کاموں کا جائزہ لیا گیا اور آئندہ کے لائحہ عمل پر تبادلہ خیال ہوا۔
ایشین ڈویلپمنٹ بینک کے وفد میں ڈیوڈمارگونز اسٹرن، سید عمر علی شاہ، حمید خان، فرانسوا لوئی گلیوم، احسن پراچہ اور وینجنگ پو شامل تھے، سیکرٹری ٹرانسپورٹ اسد ضامن اور سی ای او ٹرانس کراچی فواد غفار سومرو بھی اجلاس میں شریک ہوئے۔
اس موقع پر ریڈلائن بی آر ٹی کے لاٹ ون اور لاٹ ٹو کے تحت جاری تعمیراتی سرگرمیوں پر بریفنگ دی گئی۔
ایشین ڈویلپمنٹ بینک کے وفد کی جانب سے ریڈ لائن بی آر ٹی منصوبہ کراچی شہر کی سفری ضروریات کیلئے نہایت اہم قرار دیا گیا، وفد کا کہنا تھا کہ منصوبے کی بروقت اور معیاری تکمیل کیلئے مالی اور تکنیکی دونوں سطحوں پر ہر ممکن تعاون فراہم کیا جائے گا۔
صوبائی وزیر شرجیل انعام میمن کا کہنا تھا کہ ریڈلائن بی آر ٹی حکومت سندھ کا ترجیحی منصوبہ ہے جس سےروزانہ لاکھوں شہری مستفید ہوں گے، منصوبے پر کام کی رفتار تیز کرنے کیلئے تمام متعلقہ ادارے قریبی رابطے میں رہیں، منصوبے کی تکمیل سے شہریوں کو محفوظ، تیز اور کم لاگت سفری سہولت میسر ہوگی اور شہرکے ٹریفک نظام میں نمایاں بہتری آئے گی۔
اجلاس میں اس بات پر اتفاق کیا گیا کہ ریڈ لائن بی آرٹی کی بروقت تکمیل کیلئے تمام سٹیک ہولڈرز مشترکہ حکمت عملی اپنائیں گے۔
