اسلام آباد:(دنیا نیوز) سوئی ناردرن نے آئل اینڈ گیس ریگولیٹری اتھارٹی (اوگرا) سے گیس کی قیمت میں اضافہ مانگ لیا۔
ذرائع کے مطابق سوئی ناردرن کی جانب سے اوگرا میں درخواست جمع کرائی گئی ہے جس میں گیس کی قیمت میں اوسطاً 189 روپے فی ایم ایم بی ٹی یوکا اضافہ مانگا گیا ہے۔
ذرائع نے بتایا کہ گیس کی قیمت میں اضافہ رواں مالی سال کیلئے مانگا گیا ہے، سوئی ناردرن نے گیس کی اوسط قیمت1955روپے 50 پیسے مقرر کرنےکی درخواست کی ہے۔
اِسی طرح سوئی ناردرن کی موجودہ اوسط گیس قیمت 1766 روپے 50 فی ایم ایم بی ٹی یو ہے جب کہ سوئی ناردرن کی درخواست میں52 ارب 95 کروڑ روپے ریونیو شارٹ فال کا تخمینہ لگایا گیا ہے۔
ذرائع کا مزید کہنا تھا کہ سوئی ناردرن نے316 روپے64 فی یونٹ کاسٹ آف ایل این جی سروس مد میں بھی مانگے ہیں۔
خیال رہے سوئی ناردرن کی درخواست پر اوگرا میں سماعت 7 نومبر کو ہوگی۔
