لاہور: (دنیا نیوز) لاہور ہائیکورٹ نے چیئرمین اوگرا کو توہینِ عدالت کی درخواست پر نوٹس جاری کرتے ہوئے جواب طلب کر لیا۔
لاہور ہائیکورٹ کے جسٹس شمس محمود مرزا نے آئل مارکیٹنگ ایسوسی ایشن کی درخواست پر سماعت کی۔
درخواست گزار کے مطابق آئل مارکیٹنگ ایسوسی ایشن آئل کمپنیوں کی رجسٹرڈ تنظیم ہے تاہم مارکیٹ میں آئل ایڈوائزری کونسل کے نام سے ایک غیر قانونی ایسوسی ایشن بھی کام کر رہی ہے۔
درخواست میں مؤقف اختیار کیا گیا ہے کہ عدالت نے چیئرمین اوگرا کو آئل ایڈوائزری کونسل کی قانونی حیثیت واضح کرنے کی ہدایت کی تھی مگر عدالتی حکم کے باوجود ایسا نہیں کیا گیا۔
درخواست گزار نے عدالت سے استدعا کی کہ چیئرمین اوگرا کے خلاف توہینِ عدالت کی کارروائی عمل میں لائی جائے۔
بعدازاں لاہور ہائیکورٹ نے چیئرمین اوگرا کو توہینِ عدالت کی درخواست پر نوٹس جاری کرتے ہوئے جواب طلب کر لیا اور کیس کی مزید سماعت ملتوی کر دی۔
