لاہور: (دنیا نیوز) قومی ٹیم کے کپتان سرفراز احمد کو فواد احمد کی سلیکشن نہ ہونے پر وضاحتیں دینا پڑ گئیں۔ سرفراز احمد کا کہنا تھا ٹیم کی سلیکشن کسی کی پسند یا نا پسند کی بنیاد پر نہیں ہوئی ، انگلینڈ کی کنڈیشنز پاکستان کیلئے ہمیشہ سے مشکل رہی ہیں تاہم ٹیم اچھا پرفارم کرنے کی کوشش کرینگے۔
قومی کپتان سرفراز احمد نے کہا ہے کہ کوشش کر رہے ہیں کہ ٹیم کو زیادہ سے زیادہ اعتماد دیا جائے ، ٹیم میں اچھے سے اچھے کھلاڑی کو شامل کیا جائے۔ انہوں نے کہا ٹیم کی اچھی سلیکشن ہوئی ہے، ٹیم سلیکشن کے لیے سب کی رائے شامل ہوتی ہے۔
سرفراز احمد نے مزید کہا نوجوان کھلاڑی اچھی کارکردگی کے لیے پرعزم دکھائی دیتے ہیں۔ انہوں نے کہا 25 کھلاڑیوں میں سے ٹیم بنانی تھی ، فواد کو کیمپ میں بلایا تھا لیکن سب کی کارکردگی کو دیکھ کر سلیکشن کی، فواد عالم نے آخری بار 2009 میں ٹیسٹ میچ کھیلا تھا۔
