دبئی: (دنیا نیوز)پاکستان اور آسٹریلیا کے درمیان دوسرا ون ڈے آج کھیلا جائے گا، پانچ میچز کی سیریز میں کینگروز کو ایک صفر کی برتری حاصل ہے، شارجہ میں شاہین ہار کا بدلہ چکانے کو بے قرار ہیں.
پہلے ون ڈے میں پاکستانی باؤلرز اپنا رنگ نہیں جماسکے جس کے باعث آسٹریلین بیٹنگ لائن نے میدان مار لیا اور 8 وکٹوں سے فتح کی بدولت سیریز میں ایک صفر کی برتری حاصل کرلی، کپتان آرون فنچ 116 رنز بنا کر مرد میدان قرار پائے۔ شان مارش ناقابل شکست 85 سکور کر کے نمایاں رہے۔
اس سے قبل حارث سہیل کی اولین ون ڈے سنچری کے سہارے پاکستان کے 5 وکٹوں پر 280 ناکافی ثابت ہوئے، عمر اکمل 48 اور شان مسعود 40 بنا سکے، نیتھن کولٹر نائیل کے 2 شکار قابل ذکر رہے۔
یاد رہے کہ پاکستانی ٹیم سترہ برس سے آسٹریلیا کے خلاف ون ڈے سیریز جیتنے کی منتظر ہے۔
