آسٹریلیا میں باؤنسی وکٹیں بیٹسمینوں کے لیے آسان نہیں ہوتی: بابر اعظم

Last Updated On 15 November,2019 04:37 pm

لاہور: (ویب ڈیسک) ٹیسٹ کرکٹ میں قومی ٹیم کے سینئر بیٹمسن بابر اعظم کا کہنا ہے کہ ٹور میچ کے دوران جتنی لمبی اننگز کھیلیں اتنا ہی اچھا ہے۔

میچ کے بعد بات کرتے ہوئے ان کا کہنا تھا کہ پہلے اور دوسرے ٹور میچ کے دوران بیٹنگ کرنے سے ہمیں بہت زیادہ مدد ملی ہے۔ کوشش ہے جتنی لمبی باری کھیلی جائے اتنا ہی ٹیم کے لیے اچھا ہے۔

ٹی ٹونٹی کے کپتان کا کہنا تھا کہ آسٹریلیا میں پچز تھوڑی مختلف ہوتی ہیں جو بیٹسمینوں کے لیے آسان نہیں ہوتی۔ ہم نے ٹور میچ کے دوران بیٹنگ اور پریکٹس پچز کو دیکھتے ہوئے بیٹنگ کر رہے ہیں۔ قومی ٹیم کی باؤلنگ اور بیٹنگ اچھا پر فارم کر رہی ہے، نوجوان کھلاڑی اچھی کارکردگی دکھا رہے ہیں۔

آسٹریلیا کے خلاف میچ کے حوالے سے قومی ٹیم کے بیٹسمین کا کہنا تھا کہ میں اپنے پلان کے مطابق کھیلوں گا، کوشش ہے کہ مثبت کرکٹ کھیلیں۔ میری کوشش ہے کہ جیسے میری فارم لگی ہوئی ہے اسی طرح بیٹنگ کرتا رہوں۔

بابر اعظم کا کہنا تھا کہ نوجوان فاسٹ باؤلرز بہت اچھی باؤلنگ کر رہے ہیں اس کا فائدہ آسٹریلیا کے خلاف میچ کے دوران ہو گا۔

ان کا مزید کہنا تھا کہ آسٹریلیا میں کوئی بھی چیز مشکل نہیں تاہم یہاں پر پچز میں باؤنس زیادہ ہوتا ہے جس کے لیے ہمیں تھوڑا انتظار کر کے کھیلنا ہوتا ہے۔ کینگروز کے پاس دنیا کے بہترین باؤلرز موجود ہیں۔ وہ اپنے ملک میں بہترین باؤلنگ کرنا کا ہنر جانتے ہیں۔