لاہور: (ویب ڈیسک) پاکستان ویمن کرکٹ ٹیم کی کپتان بسمہ معروف خاندانی وجوہات کی بنیاد پر دورہ افریقہ سے دستبردار ہو گئی ہیں پاکستانی کرکٹ ٹیم کا دورہ پروٹیز اگلے ماہ شیڈول ہے۔
تفصیلات کے مطابق بسمہ معروف بیس دسمبر سے کراچی میں جاری کیمپ کا حصہ تھیں، وہ آج دوپہر کراچی سے فیملی کو جوائن کرنے کے لیے لاہور روانہ ہو چکی ہیں۔
یہ بھی پڑھیں: سال 2020 میں پاکستانی کپتانوں کے ستارے گردش میں رہے
ہیڈ آف ویمنز ونگ اور چیف سلیکٹر عروج ممتاز کا کہنا ہے کہ بسمہ معروف نے درخواست کی تھی کہ وہ اگلے ماہ دورہ جنوبی افریقا کے لیے خاندانی وجوہات کی بنیاد پر دستیاب نہیں ہیں، ہم نے بسمہ کی درخواست کو تسلیم کیا وہ خود بھی سیریز چھوڑنے پر مایوس تھیں مگر فیملی ترجیحات کو ہمیشہ فوقیت حاصل ہوتی ہے۔
انہوں نے کہا کہ جب ہم جمعرات کو سترہ رکنی سکواڈ کا اعلان کریں گے اس کے ساتھ دور جنوبی افریقا کے لیے عارضی کپتان کا اعلان بھی کیا جائے گا دورہ جنوبی افریقا تین ایک روزہ اور تین ٹی ٹونٹی پر مشتمل ہے۔
