لاہور:(دنیا نیوز)چیئرمین پی سی بی رمیز راجہ نے کہا ہے کہ انگلینڈ کرکٹ بورڈ کے چیئرمین کا بیان مبہم ہے، ہم سے سکیورٹی پر کوئی بات نہیں ہوئی۔
برطانوی اخبار سے گفتگو کرتے ہوئے پاکستان کرکٹ بورڈ کے چیئرمین رمیز راجہ نے کہا ہے کہ برطانوی ہائی کمیشن کرسٹن ٹرنر نے بھی کہا کہ انگلینڈ نے پاکستان کے لیے ٹریول ایڈوائزری نہیں بدلی۔
رمیز راجہ کا مزید کہنا تھا کہ ہم جانتے ہیں کہ کھلاڑیوں کی ویلفیئر اور سکیورٹی پر بھی ٹیم سے بات نہیں ہوئی جبکہ چیئرمین ای سی بی کا بیان مبہم ہے،کیونکہ ہم سے سکیورٹی پر کوئی بات نہیں ہوئی۔
واضح رہے کہ آج انگلش کرکٹ بورڈ نے دورہ پاکستان کی منسوخی پر معافی مانگ لی۔ چیئرمین این واٹمور کا کہنا تھا کہ فیصلے سے پاکستان سمیت کرکٹ فینز سے معذرت خواہ ہوں۔
یہ بھی پڑھیں:انگلش کرکٹ بورڈ نے دورہ پاکستان کی منسوخی پر معافی مانگ لی
چئیرمین انگلینڈ اینڈ ویلز کرکٹ بورڈ این واٹمور نے پاکستان میں سیریز نہ کھیلنے کے فیصلے پر اپنے بیان میں کہا ہے کہ مجھے افسوس ہے فیصلے سے پاکستان میں لوگ مایوس ہوئے، پاکستان کا دورہ نہ کرنے کا فیصلہ بورڈ کا تھا، فیصلے کے لئے کھلاڑیوں سے مشورہ نہیں کیا گیا تھا، سیزن کی مصروفیات کی وجہ سے ذہنی تندرستی کے لیے فیصلہ کیا گیا، بورڈ نے جو فیصلہ کیا وہ بہت مشکل تھا۔
چئیرمین ای سی بی کا کہنا تھا کہ تفصیلات میں نہیں جاؤں گا، سیکورٹی اور ویلفئیر کی ایڈوائس پر فیصلہ کیا گیا، ورلڈ کپ اور نیوزی لینڈ کے پاکستان سے جانے کے بعد فیصلہ جلد کیا گیا، فیصلے کی بنیادی وجہ کھلاڑیوں کی ویلفئیر ہی تھی، پاکستان کے ساتھ تعلقات نئے سرے سے بنانے ہیں، ہمیں 2022 کے دورے کے حوالے سے دوبارہ فوکس کرنا پڑے گا، پاکستان کے مشکور ہیں وہ گزشتہ برس انگلینڈ آئے، اگلے سال شیڈول ٹور کے حوالے سے جو ہو سکا ہم کریں گے۔
