لاہور: (ویب ڈیسک) پاکستان کرکٹ بورڈ نے آسٹریلوی کرکٹ بورڈ کی جانب سے شیڈول میچوں کے مقام کے حوالے سے میڈیا رپورٹس کو مسترد کرتے ہوئے کہا کہ آسٹریلیا کے ساتھ ایک مقام پر تمام میچز رکھنے سے متعلق کوئی تجویز زیر غور نہیں ہے۔
خیال رہے کہ آسٹریلوی کرکٹ ٹیم 1998 کے بعد رواں سال مارچ میں پاکستان کا دورہ کرے گی، دورے میں دونوں ممالک کی کرکٹ ٹیموں کے درمیان کھیلے جانے والے میچز کراچی، راولپنڈی اور لاہور میں شیڈول ہیں جبکہ سیریز کا آغاز 3 مارچ کو ہوگا۔
آسٹریلوی کرکٹ ٹیم کے دورہ پاکستان کے دوران تین ایک روزہ اور ایک ٹی ٹوئنٹی میچ لاہور میں شیڈول ہیں۔ اسی طرح پہلا ٹیسٹ میچ کراچی، دوسرا راولپنڈی اور تیسرا لاہور میں کھیلا جانا ہے۔
آسٹریلوی میڈیا کے مطابق کینگروز بورڈ اور پی سی بی میں صحت بخش ماحول اور سکیورٹی وجوہات کی بنا پر تمام ٹیسٹ میچز ایک ہی گراؤنڈ میں کرنے کے لیے مذاکرات ہو رہے ہیں۔
تاہم اب پاکستان کرکٹ بورڈ (پی سی بی) نے رپورٹس کی تردید کرتے ہوئے کہا ہے کہ ایک ہی مقام پر تمام میچز کھیلنے کی تجویز پر کوئی مذاکرات نہیں کیے گئے ہیں۔ 19 ایام کی سیریز کے تمام میچز ایک ہی جگہ پر منعقد کرنا ناممکن ہے۔
ترجمان پاکستان کرکٹ بورڈ نے کہا کہ کراچی، لاہور اور راولپنڈی میں محفوظ اور سیکیور ماحول بنانے کے لیے پی سی تمام اقدامات کر رہا ہے۔آسٹریلوی ٹیم منصوبے کے مطابق کراچی، لاہور اور راولپنڈی میں ٹیسٹ میچز کھیلے گی۔
واضح رہے آسٹریلوی کرکٹ ٹیم نے دو دہائیوں سے پاکستان کا دورہ نہیں کیا جبکہ دونوں ممالک کے درمیان یو اے ای اور انگلینڈ میں میچز کھیلے گئے ہیں۔
آسٹریلوی کرکٹ بورڈ کے چیف ایگزیکٹو نے دسمبر میں دورہ پاکستان کے حوالے سے وضاحت دیتے ہوئے کہا تھا کہ کورونا وائرس کے خدشات کے باوجود دوطرفہ سیریز شیڈول کے مطابق کھیلی جائے گی۔
گلف نیوز نے چیف ایگزیکیٹو نِک ہوکلی کے بیان کا حوالہ دیتے ہوئے کہا تھا کہ ہم پاکستان کرکٹ بورڈ سمیت تمام حکام کے ساتھ کام کر رہے ہیں۔ ہم پُرعزم ہیں لیکن یہ ایک پیچیدہ کوشش ہے، جب تک سب کچھ محفوظ ہے ہم دورے کریں گے۔
