روٹرڈیم: (ویب ڈیسک) قومی کرکٹ ٹیم کے کپتان بابر اعظم نے کہا ہے کہ نیدرلینڈز کے خلاف دوسرے ون ڈے میں جیت کا تمام کریڈٹ باؤلرز کو جاتا ہے، سلمان آغا نے کیریئر کے دوسرے میچ میں بہترین اننگز کھیلی۔
نیدرلینڈز کے خلاف دوسرے ون ڈے میچ میں فتح کے بعد اختتامی تقریب کے دوران کپتان بابراعظم نے کہا کہ فاسٹ باؤلرز نے نمی کا بھرپور فائدہ اٹھایا اور پہلے 10 اوورز میں بہت اچھی باؤلنگ کے ذریعے وکٹیں حاصل کیں اور اس کے بعد سپنرز محمد نواز اور شاداب خان نے عمدہ باؤلنگ کرکے وکٹیں دلائیں۔
انہوں نے کہا کہ ہم میچ میں پہلے باؤلنگ کرنا چاہتے تھے، صبح کے وقت پچ پر نمی تھی اس لئے ایک مختلف قسم کی پچ کی وجہ سے پہلے باؤلنگ کا فیصلہ کیا۔
ان کا کہنا تھا کہ فتح کا تمام کریڈٹ باؤلرز کو جاتا ہے، ہم مختلف کمبی نیشن آزما رہے ہیں، سلمان آغا نے اپنے کیریئر کے دوسرے میچ میں اپنی کلاس شو کی اور یقینی طور پر وہ جتنا کرکٹ کھیلے گا اتنی پرفارمنس میں بہتری آئے گی، وہ بہت پر اعتماد ہے اور یقین ہے کہ وہ آئندہ بھی اپنی پرفارمنس کو برقرار رکھیں گے۔
