لاہور: ( ویب ڈیسک ) پاکستان تحریک انصاف (پی ٹی آئی) کے لانگ مارچ میں چیئرمین اور سابق وزیراعظم عمران خان پر قاتلانہ حملے کی قومی ٹیم کے کپتان بابر اعظم، شاداب خان سمیت دیگر کھلاڑیوں نے شدید مذمت کی ہے۔
خیال رہے کہ وزیرآباد میں پی ٹی آئی چیئرمین عمران خان کے کنٹینر پر فائرنگ کی گئی جس سے سابق وزیراعظم، سینیٹر فیصل جاوید اور پی ٹی آئی رہنما احمد چٹھہ سمیت دیگر افراد زخمی ہوئے۔
اس واقعہ کے بعد کھیلوں کی دنیا کے بڑے ناموں نے حملے کی مذمت کرتے ہوئے اس واقعے کو انتہائی افسوسناک قرار دیا۔
بابر اعظم
— Babar Azam (@babarazam258) November 3, 2022
قومی ٹیم کے کپتان بابر اعظم نے عمران خان پر قاتلانہ حملے کی مذمت کرتے ہوئے سماجی رابطے کی ویب سائٹ ٹوئٹر پر لکھا کہ چیئرمین پی ٹی آئی پر اس گھناؤنے حملے کی شدید مذمت کرتے ہیں، اللہ کپتان کو سلامت رکھے اور ہمارے پیارے پاکستان کی حفاظت فرمائے، آمین۔
شاداب خان
— Shadab Khan (@76Shadabkhan) November 3, 2022
نائب کپتان شاداب خان نے بھی ٹوئٹر کا سہارا لیا اور لکھا کہ ابھی خبر سنی ہے، اللہ سب کو اپنی حفظ و امان میں رکھے، سب کو صحت دے، دعا ہے کہ واقعے کی تحقیقات ہوگی اور پاکستان میں امن ہمیشہ قائم رہے گا۔
ایک اور ٹوئٹ میں انہوں نے لکھا کہ دعا ہے عمران خان ٹھیک ہوں اور جو جو اس حملے میں زخمی ہوئے ہیں وہ جلد سے جلد صحتیاب ہو جائیں، میری پورے ملک سے گزارش ہے کہ امن قائم رکھیں۔
افتخار احمد
— Iftikhar Ahmad (@IftiAhmed221) November 3, 2022
پاکستان کرکٹ ٹیم کے آل راؤنڈر افتخار احمد نے بھی عمران خان پر قاتلانہ حملے کی شدید الفاظ میں مذمت کرتے ہوئے ٹوئٹ کیا جس میں انہوں نے لکھا کہ عمران خان بھائی پورے پاکستان کی دعائیں آپ کے ساتھ ہیں، اللہ بہت جلد آپ کو اور آپ کے سارے کارکنوں کو جلد سے جلد شفا دے، آمین۔
محمد حفیظ
— Mohammad Hafeez (@MHafeez22) November 3, 2022
قومی ٹیم کے سابق کپتان محمد حفیظ نے ٹوئٹ کیا اور لکھا کہ عمران خان پر حملے کی شدید مذمت کرتا ہوں، دعا ہے کہ وہ محفوظ رہیں اور جلد صحتیاب ہوں، آمین۔
شعیب اختر
— Shoaib Akhtar (@shoaib100mph) November 3, 2022
راولپنڈی ایکسپریس کے نام سے شہرت حاصل کرنے والے سپیڈ سٹار شعیب اختر نے ویڈیو پیغام جاری کرتے ہوئے کیپشن میں لکھا کہ عمران خان پر حملے کے بارے میں سنا، الحمد للہ وہ ٹھیک ہیں اور ان کا جذبہ بلند ہے۔ ساتھ ہی انہوں نے حملے کے بعد کا ویڈیو کلپ شیئر کرتے ہوئے مذمت کی۔
