لاہور: (دنیا نیوز) سہ ملکی سیریز کے پہلے میچ میں نیوزی لینڈ کے خلاف باؤلنگ کرتے ہوئے انجرڈ ہونے والے پاکستانی فاسٹ باؤلر حارث رؤف کی میڈیکل رپورٹس آگئیں۔
پاکستان کرکٹ بورڈ (پی سی بی) کے مطابق حارث رؤف کی انجری سنجیدہ نوعیت کی نہیں ہے، توقع ہے کہ وہ 19 فروری سے کراچی میں شروع ہونے والی آئی سی سی چیمپئنز ٹرافی 2025 کے لیے مکمل طور پر صحت یاب ہو جائیں گے۔
پی سی بی کا کہنا ہے کہ حارث رؤف آئی سی سی چیمپئنز ٹرافی کے لیے دستیاب ہوں گے، ایم آر آئی اور ایکسرے رپورٹس کے مطابق حارث رؤف کو سینے کے نچلی طرف کھچاؤ ہے۔
پی سی بی کا کہنا ہے کہ احتیاطی تدبیر کے طور پر فاسٹ باؤلر 12 فروری کو کراچی میں جنوبی افریقا کے خلاف میچ نہیں کھیلیں گے۔
خیال رہے کہ نیوزی لینڈ کے خلاف باؤلنگ کرتے ہوئے پاکستانی فاسٹ باؤلر حارث رؤف پسلیوں میں تکلیف کے باعث اوور ادھورا چھوڑ کر گراؤنڈ سے باہر چلے گئے تھے۔
