میلبرن: (ویب ڈیسک) کرکٹ آسٹریلیا نے چیمپئنز ٹرافی کے لیے حتمی سکواڈ کا اعلان کر دیا، ٹیم کینگروز سے فاسٹ باؤلر مچل سٹارک بھی دستبردار ہوگئے ہیں۔
کرکٹ آسٹریلیا کا کہنا ہے کہ مچل سٹارک ذاتی وجوہات کی بنیاد پر ٹیم سے دستبردار ہوئے ہیں، ان کے فیصلے کو سپورٹ کرتے ہیں، مچل سٹارک نے میڈیا سے پرائیویسی کی درخواست کی ہے، مچل سٹارک اس حوالے سے کوئی تبصرہ نہیں کریں گے۔
کپتان پیٹ کمنز، جوش ہیزل ووڈ اور مچل مارش پہلے ہی فٹنس مسائل کے باعث ٹیم سے باہر ہو چکے ہیں جبکہ آل راؤنڈر مارکوس سٹوئنس نے ون ڈے کرکٹ سے ریٹائر لے لی ہے۔
دوسری جانب کرکٹ آسٹریلیا نے چیمپئنز ٹرافی کے لیے سکواڈ کا اعلان کردیا، سٹیو سمتھ چیمپئنز ٹرافی میں آسٹریلیا کی قیادت کریں گے، ٹیم میں شان ایبٹ، الیکس کیری، بین ڈار شیوس اور نیتھن ایلس شامل ہیں۔
جیک فریزر میکگرک، ایرون ہارڈی، ٹریوس ہیڈ، جوش انگلس اور سپینسر جانسن ٹیم میں جگہ بنانے میں کامیاب ہوئے ہیں، مارنوس لبوشین، گلین میکسویل، تنویر سنگھا، میتھیو شارٹ اور ایڈم زمپا بھی ٹیم کا حصہ ہیں۔
چیئرمین سلیکشن پینل جارج بیلی کا کہنا ہے کہ ابتدائی سکواڈ میں انجریز اور ریٹائرمنٹ کی وجہ سے متعدد تبدیلیاں کرنا پڑیں، اب ان کھلاڑیوں کو بلایا گیا ہے جنہوں نے گزشتہ 12 ماہ میں اچھی پرفارمنس کا مظاہرہ کیا ہے۔
