راولپنڈی: (دنیا نیوز) آئی سی سی چیمپئنز ٹرافی کا جنوبی افریقہ اور آسٹریلیا کے درمیان ہونیوالا اہم میچ بارش کے باعث منسوخ کردیا گیا
راولپنڈی میں شیڈول آسٹریلیا اور جنوبی افریقہ کے درمیان میچ کا ٹاس بھی نہ ہوسکا، میچ کا ٹاس مقامی وقت کے مطابق 1 بج کر 30 منٹ پر ہونا تھا۔
پچ اور اطراف پر کور بدستور موجود ہیں اور انتظار کیا جارہا تھا کہ ہلکی بارش رکے تو ٹاس کیا جائے، سوا پانچ بجے تک بارش نہیں رکی جس کی وجہ سے میچ کو منسوخ کردیا گیا اور دونوں ٹیموں کو ایک ایک پوائنٹ دے دیا گیا۔
اس میچ کے منسوخ ہونے کے بعد گروپ بی میں اب جنوبی افریقا 3 پوائنٹس کے ساتھ سرِفہرست ہے جبکہ آسٹریلیا بھی 3 پوائنٹس کے ساتھ دوسرے نمبر پر ہے۔
آسٹریلیا کو سیمی فائنل میں رسائی کے لیے اپنے اگلے میچ میں افغانستان کے خلاف فتح لازمی حاصل کرنی ہوگی۔
