کراچی: (دنیا نیوز) سابق کپتان سرفراز احمد نے کہا کہ چمپئنز ٹرافی میں پاکستانی ٹیم نے محنت کی لیکن نتائج ہمارے حق میں نہیں آئے۔
سابق کپتان سرفراز احمد نے کہا کہ ساری ٹیمیں جیتنے کے لئے کھیلتی ہیں، دورہ نیوزی لینڈ کے لئے پاکستانی ٹیم نوجوان کھلاڑیوں پر مشتمل ہے، دورہ نیوزی لینڈ میں امید ہے کہ نتائج ہمارے حق میں آئیں گے، نیوزی لینڈ کی کنڈیشن ہمیشہ سے چیلنجنگ رہی ہے۔
سرفراز احمد کا مزید کہنا تھا کہ پی سی بی کا اچھا اقدام ہے کہ نئی ٹیم نیوزی لینڈ لے کر جا رہے ہیں، ہمیشہ یہ بات کی جاتی ہے ٹیم اچھا نہیں کھیلی، پرانے کرکٹرز، مینجمنٹ اور کوچز بھی جانتے ہیں کہ کوئی ٹیم ہارنے کے لئے نہیں کھیلتی، جب بھی کھلاڑیوں پر تنقید کریں تو بات بیلنس رکھ کر کریں۔
سابق کپتان کا کہنا تھا کہ جو ٹی وی پر بیٹھے ہیں وہ ان مراحل سے گزرے ہوئے ہیں، کھیلتے ہوئے رویہ کچھ ہوتا ہے اور جب کرکٹ چھوڑ جاتے ہیں تو تبدیل ہو جاتا ہے، ہار اور جیت کھیل کا حصہ ہے، ہم سب کو ملکر پاکستان کرکٹ کی بہتری کے لئے کام کرنا چاہئے۔
ان کا مزید کہنا تھا کہ چمپئنز ٹرافی کے فائنل میں دو بہترین ٹیمیں آمنے سامنے ہیں، فائنل میں بھارتی کو دبئی میں رہنے کا ایڈواٹیج ہوگا، پاکستانی قوم سے کہتا ہوں کہ آپ نے ہمیشہ ٹیم کو سپورٹ کیا ہے۔
سابق کپتان نے کہا کہ قوم کو کہتا ہوں اب بھی ٹیم کے ساتھ کھڑے رہیں، امید ہے کہ آنے والا وقت پاکستان کرکٹ کے لئے اچھا ہوگا۔
