لاہور: (ویب ڈیسک) قومی کرکٹ ٹیم کے سابق ہیڈکوچ مکی آرتھر نے پاکستان کرکٹ کی تباہی کے ذمہ داروں سے پردہ اٹھادیا۔
سابق پاکستانی کوچ جیسن گلیسپی نے کچھ روز قبل عاقب جاوید کو مسخرہ قرار دیتے ہوئے انہیں اپنی ذمہ داری سے الگ ہونے کی وجہ قرار دیا تھا، اب ایک اور سابق کوچ مکی آرتھر نے بھی ان کی تائید کردی۔
انہوں نے کہا کہ پاکستانی کرکٹ خود ہی اپنے پاؤں پر کلہاڑی مار رہی ہے، وہ خود ہی اپنی بدترین دشمن ہے، وہاں پر کرکٹ کو ایجنڈوں کے تحت چلایا جاتا ہے، جیسن گلیسپی اور گیری کرسٹن ان کی کرکٹ کو آگے لے جا سکتے تھے اس لیے انہیں ہٹادیا گیا۔
سابق ہیڈ کوچ مکی آرتھر نے کہا کہ گلیسپی ایک حیران کن کوچ اور انسان ہیں، پاکستان کرکٹ بدستور اپنے پاؤں پر کلہاڑی مار رہی ہے، پاکستان میں بہت بڑی تعداد میں بہترین کھلاڑی موجود ہیں، انہیں اب وسائل بھی دستیاب ہیں، بے تحاشا نوجوان ٹیلنٹ اور انتہائی بہترین سکلز ہیں اس کے باوجود وہ افراتفری کا شکار ہیں، یہ صورتحال واقعی ہی افسوسناک ہے۔
مکی آرتھر نے مزید کہا کہ پاکستان نے بہترین کوچز کی خدمات حاصل کر لی تھیں جو انہیں آگے لے جاسکتے تھے لیکن اس کے بعد وہ مشینری حرکت میں آگئی جو پاکستان میں چیزوں کو کمزور کرتی ہے۔
