کرائسٹ چرچ: (دنیا نیوز) پاکستان ٹی 20 ٹیم کے نومنتخب کپتان سلمان علی آغا نے کہا ہے کہ ہم یہاں جیتنے آئے ہیں، اچھی کرکٹ کھیلیں گے، صائم اور فخر کی کمی محسوس ہو گی۔
قومی ٹی 20 ٹیم کے کپتان سلمان علی آغا نے کرائسٹ چرچ میں پریس کانفرنس کرتے ہوئے کہا ہے کہ پاکستانی فینز ہم سے خوش نہیں کیونکہ ہم نے اچھی کرکٹ نہیں کھیلی، ہم نے نہ ہی فینز کی توقعات کے مطابق کرکٹ کھیلی اور نہ ہی اپنے معیار کی کرکٹ کھیلی۔
سلمان علی آغا کا کہنا تھا ہماری نئی ٹیم ہے اس کا مطلب یہ نہیں اچھی ٹیم نہیں ہے، سینئر بھی ہیں، ٹیم میں اچھا کمبی نیشن ہے، ہم یہاں جیتنے آئے ہیں، ہم اچھی کرکٹ کھیلیں گے۔
قومی کپتان کا کہنا تھا کہ ہیگلے اوول گراؤنڈ کی پچ بظاہر گرین لگ رہی ہے لیکن یہاں سپینرز کو بھی مدد ملے گی، شاہین اور حارث رؤف کی ٹی 20 میں کارکردگی بہتر ہے جبکہ فخر زمان اور صائم ایوب کی کمی محسوس ہو گی کیونکہ دونوں ٹیم کے اہم کھلاڑی ہیں، دونوں کی تیزی سے صحتیاب بھی ہو رہے ہیں اور امید ہے آنے والی سیریز میں دونوں ایکشن میں ہوں گے۔
سلمان علی آغا کا یہ بھی کہنا تھا کہ بابر اعظم اور محمد رضوان کی پاکستان کرکٹ کیلئے بہت خدمات ہیں، اب نیا کمبی نیشن بنانے کی کوشش کی ہے لیکن پہلے میچ کے لیے پلیئنگ الیون کا ابھی فیصلہ نہیں کیا۔
